Aİ Rusiya qazının Azərbaycan vasitəsilə idxalını təkzib edib

Bakı/25.09.23//Turan: Avropa İttifaqı Azərbaycandan qaz idxalını artırmaq öhdəliyini bir daha təsdiqləyib və bununla da Azərbaycana qarşı potensial sanksiyalarla bağlı şayiələri aradan qaldırıb.

Bu spekulyasiyalar Azərbaycan sentyabrın 19-20-də Qarabağda antiterror tədbirləri həyata keçirdikdən sonra yaranıb.

Avropa Komissiyasının İqlim Fəaliyyəti və Enerji üzrə nümayəndəsi Tim Makfi ermənipərəst jurnalistə cavab olaraq bildirib ki, Azərbaycan və Aİ arasında 2022-ci ilin iyulunda imzalanmış anlaşma memorandumu “qüvvədədir”.

“Azərbaycandan qaz tədarükü Avropa İttifaqının bu resurs idxalının 3 faizini təşkil edir, 2021-ci ildə bu göstərici 2 faiz olub. Bu il də analoji səviyyəyə çatacağımızı gözləyirik. 2021-ci ildə biz 8,1 milyard kubmetr Azərbaycan qazı idxal etmişiksə, 2022-ci ildə artıq 11,3 milyard kubmetr qaz əldə etmişik. Beləliklə, artım müşahidə olunur. Biz 2027-ci ilə qədər Azərbaycan qazının tədarükünün 20 milyard kubmetrə çatdırılmasını, həmçinin bərpa olunan enerji mənbələri sahəsində daha geniş əməkdaşlığı nəzərdə tutur anlaşma memorandumu imzalamışıq”, - deyə o bildirib. 

Daha sonra Makfi jurnalistlərə “Avropa İttifaqının Azərbaycandan idxal etdiyi tədarüklərdə Rusiya qazının olmadığını” da izah edib.

“Bu, həcm məsələsidir. Rusiyadan Azərbaycana ixrac olunan qazın həcmi bizim Azərbaycandan idxal etdiyimizdən xeyli azdır, ona görə də bu tədarüklərdə Rusiya qazı yoxdur. Biz yalnız Xəzər resurslarını idxal edirik”, - deyə o, bildirib. –0-