"Bakı-2015" zamanı beynəlxalq rouminq ucuzlaşacaq

 "Bakı-2015" Avropa Oyunları zamanı beynəlxalq rouminq ucuzlaşacaq.

Rabitə və Yüksək Texnologiyalar Nazirliyinin məlumatında deyilir ki, artıq təkliflər hazırlanıb və Nazirlər Kabinetinə göndərilib.
“Bakı 2015 - I Avropa Oyunları”na hazırlıq üzrə Rabitə və Yüksək Texnologiyalar Nazirliyində keçirilən Rəhbər Komitənin iclasında  nazir Əli Abbasov bildirib ki, Rusiya ilə Azərbaycan arasında rouminq tariflərinin azaldılması ilə bağlı aparılan işlərin yaxın zamanlarda səmərə verəcək. O, bu siyasətin digər ölkələrlə də həyata keçirildiyini qeyd edib.
   Abbasov dövlət və özəl strukturlara tapşırıb ki, Avropa Oyunları zamanı telekommunikasiya infrastrukturunun keyfiyyətli işi üçün lazımi tədbirlər görsünlər.

Oyunların təşkilində məlumatların qorunması, informasiya təhlükəsizliyi və kibertəhlükəsizliyin təmin edilməsi məqsədilə mütəmadi monitorinqlərin aparılması, şəbəkə hazırlığı və dözümlülüyü üzrə müxtəlif test-sınaqların həyata keçirilməsi planlaşdırılır.

İclas çərçivəsində iştirakçıların mobil qurğularının qeydiyyatı, oyun yerlərində rabitə və internet təminatı müzakirə olunub.
Xidmətlərin təşkili üzrə prosesə cəlb edilən şirkətlər, eləcə də tədbirə dəstək verəcək digər sponsor təşkilatlarla yaxın həftələrdə müqavilələrin bağlanması nəzərdə tutulur.

Nazir Əli Abbasov görüşdə təmsil olunan özəl və dövlət qurumlarının təmsilçilərinə müvafiq tövsiyələrini də bildirərək, “Bakı 2015 - I Avropa Oyunları”nda rabitə xidmətlərinin yüksək səviyyədə təşkilinin təmin edilməsi ilə bağı göstəriş və tapşırıqlarını verib. Sifarişçi-icraçı tərəf arasında məsuliyyətin dəqiqliklə bölüşdürülməsi baxımından tənzimləyici-hüquqi sənəd kimi Anlaşma Memorandumunun vacibliyinə diqqət çəkən nazir Əli Abbasov sənəddə bütün detalların ətraflı müzakirə edilərək nəzərə alınmasını məqsədəuyğun sayıb. --17D—