Laçın otlaqlarına 100 baş yak buraxılıb

Bakı/12.15.22/Turan: Qırğızıstandan təyyarə ilə Laçın rayonuna xüsusi qəfəslərdə 100 baş yak gətirilib. Bu barədə Kənd Təsərrüfatı Nazirliyinin mətbuat xidmətindən məlumat verilib.

Qurumun planlarına Azərbaycanda ixtisaslaşmış ətlik yaxalıq təsərrüfatının yaradılması daxildir. Proses pilot layihə çərçivəsində həyata keçirilib və sınaq məqsədi daşıyır. Kəlbəcər və Laçın rayonlarında yaklar gətirilməzdən əvvəl Qırğızıstan mütəxəssislərinin iştirakı ilə monitorinqlər aparılıb və müvafiq sahələr seçilib.

Damazlıq heyvanlar seçildikdən sonra onların təhlükəsiz daşınması üçün hava nəqliyyatının tələblərinə uyğun xüsusi qəfəslər hazırlanıb. Yaklar bu qəfəslərdə təyyarə ilə Azərbaycana gətirilib, Bakıdan irihəcmli yük maşınları ilə dislokasiya nöqtəsinə aparılıb.

"Dağlıq ərazilərdə soyuq iqlim şəraitində yaşamağa uyğunlaşmış heyvanların Laçın rayonunda öncədən müəyyən edilmiş ərazidə yerləşdirilməsi təmin edilib. Hazırda heyvanların yerli şəraitə adaptasiyası prosesi davam edir. Açıq ərazilərdə bəslənəcək yaklar mütəxəssis nəzarətində saxlanır.

Ərazidə heyvanların ovlanmasını qadağan edən xüsusi xəbərdarlıqedici lövhələr quraşdırılıb. Heyvanların təbii şəraitə  uyğunlaşma prosesini izləmək üçün Kənd Təsərrüfatı Nazirliyi tərəfindən davamlı monitorinqlər keçirilir". - nazirliyin məlumatında deyilir.

Qeyd edək ki, yak heyvan növünun əsas xüsusiyyətlərindən biri xüsusi yem rasionu olmadan təbii otlaq sahəsində yetişdirilməsidir. Örüş-otlaq sahəsində olan bitkilərlə qidalanan yaklar yemə az tələbkardır. 

25 ilə qədər yaşaya bilən yakların südünün yağlılığı 9 faizdir. Ət çıxımına və keyfiyyətinə görə bu heyvanların yetişdirilməsi iqtisadi cəhətdən səmərəlidir”, - Kənd Təsərrüfatı Nazirliyinin açıqlamasında bildirilir. 

Lakin agentlik hələlik bu layihənin maliyyə tərəflərini - heyvanların alınması üçün müqavilənin dəyəri, onların mühafizəsi xərcləri və s açıqlamayıb. 08B