Problemli şirkətlər holdinqi

Bakı/06.11.20/Turan:  Noyabrın 5-də prezident İlham Əliyevin fərmanı ilə bir sıra dövlət qurumların idarəetməsi bu ilin avqust ayında yaradılmış Azərbaycan İnvestisiya Holdinqinə verilib. 

Həmin qurumların sırasına Dövlət Neft Şirkəti, “Azərbaycan Hava Yolları” QSC,

“Azərbaycan Dəmir Yolları” QSC, “Azərbaycan Xəzər Dəniz Gəmiçiliyi” QSC, “Bakı Metropoliteni” QSC, “AzerGold” QSC, “Azərenerji” ASC, “Azərsu” ASC, “Azərişıq” ASC, Azərbaycan Meliorasiya və Su Təsərrüfatı ASC, “Azərkosmos” ASC, “Azərbaycan Beynəlxalq Bankı” ASC, “Azər-Türk Bank” AAS,“Azəristiliktəchizat” ASC, “Təmiz Şəhər” ASC daxildir.

Bura habelə “Bakı Beynəlxalq Dəniz Ticarət Limanı” QSC,  “Aztelekom” MMC, “Azerbaijan International Telecom” (AzInTelecom)” MMC, “Azərpoçt” MMC,  “Bakı Telefon Rabitəsi” MMC və  Dövlət Sığorta Kommersiya Şirkəti də aiddir.

Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bir sıra dövlət qurumların idarəetməsini Azərbaycan İnvestisiya Holdinqə verilməsini müsbət qiymətləndirdiyini dedi. 

Deputat Turana bildirib ki, İnvestisiya Holdinqi yarananda orada müəyyən qrupların cəmləşəcəyi və investisiya yatırımı, ondan əlavə də ciddi dəyişikliklərin olacağı artıq bəlli idi. «Bu şirkətlər ki, hansıların idarəetməsi Holdinqə verilib, onlar Azərbaycanın iqtisadi həyatında önəmli şirkətlərdir, strateji obyektlərdir. Və bu şirkətlərdə ola bilsin kadr dəyişikliyi getsin, müəyyən islahatlar həyata keçirilsin, hətta ola bilsin ki, bəzi payları özəlləşdirməyə verilsin». 

Deputat dövlət şirkətlərində islahatların olacağının qənayətindədir. «Uzun müddətdir ki, həmin bu önəmli şirkətlərdə islahatlar həyata keçirilmirdi. Dövlət başçımızın son fərmanından sonra isə orada islahatlar gedəcək, dediyim kimi şirkətlərdən bəziləri özəlləşdiriləcək, çünki onların hamısının dövlət balansında qalmağın ehtiyacı yoxdur, elə istehsal sahələr var ki, onların dövlət əhəmiyyəti yoxdur. İşlər görüləcək və mənə elə gəlir ki, iki-üç ay ərzində o şirkətlər artıq təkmilləşəcək və iqtisadiyyata önəmli gəlirlər verəcəklər». 

İqtisadçı Toğrul Vəliyev isə hesab edir ki, bir sıra dövlət şirkətlərin idarəetməsini yeni yaranmış holdinqə verilməsindən sonra ciddi dəyişikliklər gözlənilmir. «Azərbaycan İnvestisiya Holdinqin bir neçə ay bundan əvvəl yaranması bu islahatlarla bağlı idi, dövlət şirkətlərin idarəetmə sistemini dəyişmək istəyirdilər. Çünki dövlət şirkətlərində bəllidir ki, idarəetmə sistemi çox qeyri-effektivdir və vaxtilə prezident demişdi ki, korporativ idarəetmə sistemini tədbiq etmək lazımdır. Bu holdinqdə qeyd olunan şirkətlərin birləşməsi o deməkdir ki, korporativ idarəetmə sistemi tədbiq olunsun. Ola bilsin gələcəkdə onların hər hansısa özəlləşdirilsin və ya kommersiya tipli şirkət kimi yanaşma formalaşsın. Çünki bu günə kimi qeyd olunan dövlət şirkətləri əsasən dövlət büdcəsindən maliyyələşirdi. Son fərman da onların effektivliyinin artırılması məqsədilə verilib. Amma məsələ ondadır ki, bizdə daimi olaraq belə bir addımlar atılır, bir neçə ildən bir nəyisə dəyişmək üçün bu məsələlər qaldırılır, qeyd edilir ki, şirkətlər mənfəət verməlidir. Mən bu addımların effektivliyinə inanmıram. Çünki müxtəlif istiqamətli şirkətlərin idarəetməsi vahid orqana verilib və onların vahid idarəetməsi mümkün deyil. Sadəcə yenidən yeni bir struktur yaranacaq və fikrimcə qeyri effektiv bir struktur olacaq.  

İqtisadçı qeyd edib ki, dövlət şirkətlərin idarəetməsi vahid orqana verilməsi onların mənfəət gətirilməsinə səbəb olmayacaq. «Onsuz da dövlət büdcəsinin gəlirləri azalır, onsuz da neftin qiyməti aşağıdır, onsuz da gələn ildən bizdə neftdən asılılığı azalmalıdır və bu addım ona görə atılıb ki, şirkətlər mənfəət gətirməyə başlasınlar. Hansı dərəcədə bu mümkün olacaq bəlli deyil. Çünki nə Azərsu, nə Azərişıq nə Meliorasiya və su təsərrüfatı mənfəət gətirə bilməyəcək. Çünki onlara xərclər kifayət qədər yüksəkdir. Sadəcə zahiri görünüş dəyişəcək». –0--