Qiymətli kağızlar bazarının peşəkar iştirakçıları azalır

“İnterneyşnl Tranzakşin Sistem” MMC-nin qiymətli kağızlar bazarında broker və diler fəaliyyətinin həyata  keçirilməsi dayandırılıb. Bu barədə qərarı qiymətli kağızlar bazarında nəzarət üzrə dövlət orqanı qəbul edib.

Qiymətli Kağızlar üzrə Dövlət Komitəsinin ictimaiyyətlə əlaqələr sektorunun məlumatında deyilir ki, bu şirkətlə bağlı qərar “Qiymətli kağızlar bazarının peşəkar iştirakçılarının hesabatlarına dair tələblər, habelə onların təqdim edilməsi və açıqlanması qaydaları”nın tələblərini mütəmadi surətdə pozduğuna görə qəbul edilib.

“İnterneyşnl Tranzakşin Sistem” MMC-nin broker fəaliyyəti üçün lisenziyasının müddəti 2016-cı ilin aprelində, diler fəaliyyətinə dair lisenziyanın müddəti 2017-ci ildə bitir.

Şirkət qiymətli kağızlar bazarına 2006-cı ildə daxil olub. Şirkət bu və ya digər formada “General Construction” şirkətlər qrupuna aid olub.

“İnterneyşnl Tranzakşin Sistem” MMC əsasən Azərbaycan Beynəlxalq Bankı ASC müştərilərinə xidmət edib və onun səhmlərinin buraxılışı üzrə anderrrayter olub. Bu ilin mayında şirkət Bakı Fond Birjasının renkinqində 41,1 min manat dövriyyə ilə 1-ci yerdən 9-cu yerə enib.

Qeyd edək ki,  “İnterneyşnl Tranzakşin Sistem” MMC-nin lisenziyasının faktiki ləğvi qiymətli kağızlar bazarının iştirakçıları arasında xroniki hala çevrilib. Məsələ bundadır ki, qiymətli kağızlar bazarının peşəkar iştirakçılarının əksəriyyəti hesabatlılıq, onların təqdim olunması və açıqlanması qaydalarını müntəzəm olaraq pozurlar. 

Hazırda qiymətli kağızlar bazarında broker fəaliyyəti üzrə 12, diler fəaliyyəti üzrə 13 lisenziya var.08B