AMB: Sosial şəbəkələrdə investisiya şirkəti peyda olub

Azərbaycan Mərkəzi Bankı (AMB) sosial şəbəkələr üzərindən ölkə vətəndaşlarına xidmətlər təklif edən “Maryam İnvest” investisiya şirkəti barədə xəbərdarlıq edib.

Bu barədə tənzimləyici qurumun internet səhifəsində bildirilir.

Məlumatda deyilir ki, son vaxtlar ölkə hüdudlarından kənarda yeni fırıldaqçılıq hallarına cəhd edilir. AMB-yə daxil olmuş vətəndaş müraciətləri əsasında araşdırmalar göstərib ki, naməlum şəxslər yüksək gəlir vəd edərək insanların pulunu mənimsəməyə çalışır. Onlar “Maryam İnvest”in AMB-dən lisenziya aldığını bildirərək saxta sənədlər əsasında vətəndaşların etibarını qazanmağa çalışır, insanları təqdim etdikləri xarici bank hesablarına pul köçürməyə təşviq edirlər.

AMB əhalini diqqətli olmağa, belə təkliflərə aldanmamağa, investisiya xidmətlərindən istifadə etməmişdən əvvəl bu xidmətləri təklif edən hüquqi şəxsin adının AMB-dən lisenziya almış investisiya şirkətlərinin siyahısında (https://www.cbar.az/page-200/investment-companies) olub-olmadığını aydınlaşdırmağa çağırıb. -0-