Azərbaycanda ilk özəl kredit bürosu

Bakı/19.04.17/Turan: Çərşənbə günü Azərbaycanda ilk özəl kredit bürosunun (ÖKB) yaradılması haqda təsis sənədləri imzalanıb.

Beynəlxalq Maliyyə Korporasiyasının (IFC) nümayəndəsi Teymur Heybətov bildirib ki, sənədlər İslandiyanın “Creditinfo” təşkilatı ilə Azərbaycanın 21 təşkilatı arasında imzalanıb.Yerli təşkilatlar arasında banklardan başqa bir kredit təşkilatı və bir sığorta şirkəti var.

ÖKB-nin 51% payı İslandiyanın “Creditinfo Group” şirkətinə, 49% digər iştirakçılara məxsus olacaq. Nizamnamə kapitalı 2,2 mln. avro təşkil edəcək.

Büronun 9 nəfərdən ibarət Direktorlar Şurası seçilib. Elçin Əhmədov baş direktor təyin edilib.

Maliyyə Bazarlarına Nəzarət Palatasının icraçı direktorunun müavini Asim Zülfüqarov bildirib ki, ÖKB-nin yaradılması maliyyə sabitliyinin təminatına, maliyyə institutlarının effektiv inkişafına xidmət edəcək.

“Hazırda Azərbaycanda yetkinlik yaşına çatmış əhalinin 36%-nin kredit tarixçəsi mərkəzləşdirilmiş kredit reyestrində toplanıb. ÖKB-nin yaradılması ilə bu rəqəm artacaq”, - o bildirib.

Beynəlxalq Maliyyə Korporasiyasının (IFC) Azərbaycandakı daimi nümayəndəsi Aliyə Əzimova qeyd edib ki, ÖKB risklərin idarə olunmasının effektivliyini təmin edəcək.

“Biz ümid edirik ki, ÖKB maliyyə sektorunda struktur islahatlarına xidmət edəcək”, - o deyib.

 “Creditinfo”nun təsisçisi və rəhbəri Reynir Qretarsson bildirib ki, ÖKB dövlət kredit bürosundan  daha çox informasiya mənbəyinə və istifadəçiyə malik olacaq. Büro lizinq şirkətlərindən, mobil operatorlardan və kommunal müəssisələrdən informasiya əldə edəcək.

“Bütün borclar bir faylda göstəriləcək ki, bu da maliyyə strukturlarına və kreditorlara rusklərin effektiv qiymətləndirilməsində köməklik edəcək. Bu, xərcləri azaldacaq, kredit məhsullarının əldə olunması imkanlarını artıracaq”, - o vurğulayıb.

Azərbaycan Banklar Assosiasiyasının prezidenti Zakir Nuriyev deyib ki, ilkin mərhələdə kredit haqda informasiyanı banklar alacaqlar.

“Gələcəkdə çalışacağıq ki, kredit informasiyasını kommunal sektor da əldə edə bilsin”, - o bildirib.

Xatırladaq ki, “Kredit büroları haqqında” qanun 2016-cı ildə qəbul edilib. Kredit bürosu banklar və digər kredit təşkilatları üçün kredit almaq istəyənlər haqda informasiya bazası olacaq.  –71D-