“Hökumət banklara dəstək verməlidir”, - Samir Əliyev

Bakı/03.04.20/Turan: “Koronavirusun yayılmasına görə yaranan situasiya ilə əlaqədar bankların kreditlərin qaytarılması məsələsində mövqelərini yumşaltması ilə bağlı təkliflər səslənir. Bunun üçün ilk növbədə hökumət banklara dəstək verməlidir”.

Bunu “Turan”la söhbətində iqtisadçı Samir Əliyev deyib.

O qeyd edib ki, hökumətin dəstəyi olmadan banklar müştəriləri üçün yumşalmaya gedə bilməz.

Onun fikrincə, addımlardan biri kimi problemli kreditlərin təsnifat qaydalarının dəyişməsi olardı.

“Yəni müəyyən müddətdə kreditin ödənişi ləngiyirsə, o problemli hesab olunur və bank problemli kreditin yerini doldurmaq üçün öz büdcəsindən vəsait ayırmalıdır. Hesab edirəm ki, Mərkəzi Bank müvəqqəti olaraq bu qaydaları dondurmalıdır. Bundan əlavə, Mərkəzi Bank bankları ucuz kreditlərlə təmin etməlidir ki, onlar da öz növbəsində kredit şərtlərini sadələşdirsinlər”, - deyə ekspert bildirib.

Samir Əliyev hesab edir ki, mövcud situasiyada banklar üçün əsas çətinlik kreditlərin qaytarılması ilə bağlı problemlərdir.

“Əgər sahibkar işləmirsə, bu o deməkdir ki, onun mənfəəti yoxdur”, - deyə o qeyd edib.

İqtisadçı hazırki situasiyanın bank sektoruna digər neqativ təsiri kimi neftin qiyməti düşəndən dərhal sonra yaranan ajiotajı hesab edir.

“Əhali əlində olan manatı dollara dəyişməyə, bankardan milli valyutada olan depozitləri götürməyə tələsdi. Bütün bunlar əlbəttə ki, bank sektoruna neqativ təsir göstərir. Bu proseslər yenə də bank sektorunun dollarlaşmasına gətirib çıxaracaq, çünki əksəriyyət depozitləri ABŞ valyutasında yatırmağa üstünlük verəcək”, - deyə o fikrini tamamladı.–71В-