ABŞ-ın yardımı koronavirusa qarşı mübarizədə Azərbaycanın potensialının artırılmasına yönəldiləcək

Bakı/03.04.20/Turan: ABŞ-ın Azərbaycanda koronavirusun yayılmasına qarşı mübarizə tədbirlərinə dəstək məqsədilə ayırdığı yardım ölkədə işləyən üç beynəlxalq təşkilat arasında bölünəcək.

Beynəlxalq İnkişaf Agentliyi (USAİD) vasitəsilə 1,7 mln. dollar ayrılıb. Bu məbləğ USAİD-in Azərbaycan hökuməti ilə əməkdaşlıq edən tərəfdaşları - Ümumdünya Səhiyyə Təşkilatı (ÜST), BMT-nin Uşaq Fondu (UNİCEF) və Beynəlxalq Qızıl Xaç və Qızıl Aypara Cəmiyyətləri Federasiyası (İFRC) arasında bölünəcək, bu barədə ABŞ-ın Azərbaycandakı səfirliyinin məlumatında deyilir.

Bu vəsait Azərbaycanın milli laboratoriyalarının möhkəmləndirilməsinə, infeksiyaların qarşısının alınması və nəzarət sahəsində fəaliyyətin genişləndirilməsinə, səhiyyə işçilərinin imkanlarının artırılmasına, habelə ictimaiyyətin virus haqqında məlumatlandırılmasına və onun yayılmasının qarşısının alınmasına yönəldiləcək. -06В-