Kredit Zəmanət Fondu yaradılır

Bakı/15.09.17/Turan: Azərbaycanda "Kredit Zəmanət Fondu" ASC yaradılır. Müvafiq fərmanı cümə günü prezident İlham Əliyev imzalayıb.

Fondun yaradılmasında məqsəd sahibkarların maliyyə resurslarına çıxış imkanlarının genişləndirilməsinə dövlət dəstəyidir.

KZF sahibkarların müvəkkil banklardan manatla aldıqları kreditlərə təminat verəcək və həmin kreditlərə hesablanmış faizlərin bir hissəsinə subsidiya verəcək.

Fond 7 nəfərdən ibarət Müşahidə Şurası tərəfindən idarə olunacaq. Fonda cari rəhbərliyi İdarə Heyəti həyata keçirəcək.

Müşahidə Şurası Maliyyə Nazirliyinin 1, İqtisadiyyat Nazirliyinin 1, Azərbaycan Mərkəzi Bankının 1, Maliyyə Bazarlarına Nəzarət Palatasının 1, Dövlət Neft Fondunun 1, Sahibkarlar (İşəgötürənlər) Təşkilatları Milli Konfederasiyasının 1 və Azərbaycan Banklar Assosiasiyasının 1 nümayəndəsindən ibarət olacaq.

Müşahidə Şurasına rəhbərlik rotasiya prinsipi üzrə həyata keçiriləcək. Sədrin səlahiyyət müddəti bir ildir.-71D-