Açiq mənbələrdən foto.
Rövşən Ağayev: “DSMF-nin büdcəsi şəffaf tərtib edilmir”
Bakı/07.11.23/Turan: Hesablama Palatası Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) 2024-cü il büdcəsi haqqında qanun layihəsinə rəy verib.
Sənəddə deyilir ki, Fondun gələn il gözlənilən 6 919,9 milyon manat məbləğində gəlirlərinin 5 288,1 milyon manatı və yaxud 76,4%-i məcburi dövlət sosial sığorta haqlarının hesabına formalaşacaq. Bu, 2023-cü ilin təsdiq olunmuş proqnozu ilə müqayisədə 5,7% çoxdur.
Gələnilki gəlirlərin 1 392 milyon manatını (5,2% az) dövlət büdcəsindən transfert, 227 milyon manatını qalıqdan xərcə yönəldilmiş vəsait, 12,7 milyon manatını (0,8% çox) isə sair gəlirlər təşkil edəcək.
Beləliklə, 2024-cü ildə DSMF-nin büdcədən asılılığı 20,1% təşkil edəcək ki, bu da 2023-cü ilə nisbətən 3,3 faiz bəndi azdır.
İqtisadçı-ekspert Rövşən Ağayev hesab edir ki, DSMF-nin büdcəsi şəffaf tərtib edilmir: “Bu, özünü həm gəlirlər, həm də xərclər hissəsində göstərir.
Məsələn, gəlirlər hissəsində dövlət və özəl sektordan yığımları ayrıca göstərmək mümkündür, amma etmirlər. Əvəzində "büdcə" və "qeyri-büdcə" sektorları bölgüsündən istifadə edirlər. Niyə belə edirlər? Çünki "qeyri-büdcə" sektoru bütün özəl və dövlət şirkətlərinin hamısını əhatə edir. Onların hər biri üzrə ödəmələri ayrıca versələr, məlum olacaq ki, Fondun gəlirlərinin hər 100 manatından azı 75 manatı dövlət sektorunda (büdcə təşkilatları+dövlət müəsssiləri+ büdcə transfertləri) formalaşır.
Xərclərə gəldikdə, pensiya növləri üzrə (yaşa, əlilliyə və ailə başçısına itirməyə) fondun xərcləri ayrıca göstərilə biləcəyi halda göstərilmir”. -0-
Maliyyə
-
2021-2024-cü illərdə Azərbaycanın işğaldan azad edilmiş ərazilərinin bərpasına dövlət büdcəsindən 10 milyard ABŞ dollarından artıq vəsait ayrılıb ki, bu da Hesablama Palatasının qarşısında yeni vəzifələr müəyyən edir.
-
Oktyabrın 3-də Bakıda Ali Audit Qurumlarının Avropa Təşkilatının (EUROSAI) Ətraf Mühitin Auditi üzrə İşçi Qrupunun (WGEA) illik toplantısı işə başlayıb.
-
“Caspian Equipment Company” səhmdar cəmiyyəti (mühərrik və sürtgü yağları, akkumulyator, şin, filtr və digər ehtiyat hissələri satır) 0,1 milyon manatlıq səhm emissiyası elan edib.
-
Rəqəmsal İnkişaf və Nəqliyyat Nazirliyinin tabeliyindəki “Bakı Telefon Rabitəsi” (“Baktelekom”) şirkəti 96 əməkdaşının və ailə üzvlərinin könüllü tibbi sığortalanması üçün açıq tender keçirir.
Rəy yaz