250 nəfər Azərbaycan vətəndaşı Dağıstandan qayıdır

Bakı/23.06.20/Turan: Yaxın saatlarda Dağıstanın Qullar qəsəbəsindən Azərbaycana 250 azərbaycanlı vətəndaş gələcək. Onlar aprel ayından sərhəddi keçmələrini gözləyirdilər. Bu barədə Turan-a bu qrupun üzvləri telefonla bildiriblər.

“Bu dəfə siyahılar ədalətli şəkildə tərtib edilib və aprel ayından burada olanların hamısı Vətənə qaytarılır”, - onlardan biri deyib. Qayıdanlar karantinə yerləşdiriləcək.

Bundan sonra Dağıstanda təxminən 350 nəfər qalacaq, onları da sonra göndərəcəklər.

Ötən gün Dərbənd və Məhərrəmkənd rayonları sərhəddində yerləşən çadır şəhərciyinə DİN, FHN və hərbçilərin nümayəndələrindən ibarət Azərbaycan nümayəndə heyəti gəlib. Bu barədə Dərbənd rayonunun rəhbəri vəzifəsini icra edən Fuad Şıxiyev İnstagram səhifəsində bildirib.

“Gəlişin məqsədi müvəqqəti çadır şəhərciyində əlavə yerlər təşkil etməyin mümkünlüyü, oradakı vətəndaşların yaşayış şəraiti ilə tanış olmaqdır”, - o yazıb.

Dərbənddə Azərbaycan diasporunun nümayəndəsi Qəni Panayev Azərbaycan nümayəndə heyəti ilə görüşdə iştirak edib. O bildirib ki, bu gün sərhəddi 250 nəfər keçəcək.

Q.Panayev bildirib ki, Azərbaycan FHN və DİN-dən olan məmurlar daha 50-60 nəfərin yerləşdirilməsi üçün çadırların sayını artırmaq niyyətindədirlər.

“Bundan əlavə, Azərbaycan FHN iki çadır-mətbəx quracaq, onların hər birində 450 nəfərə xidmət göstərmək mümkün olacaq. Bu, gələnlərin sayının çox olması halında ediləcək. Çadırlara xidmət Azərbaycan FHN öz üzərinə götürür”, - Q.Panayev deyib və əlavə edib ki, Azərbaycan tərəfi yerli hakimiyyətlə birgə əməkdaşlıq barədə razılığa gəlib.—06В-