62 problemi məntiqi sona çatır

Bakı/11.05.21/Turan: Mayın 4-də Azərbaycan üç hərbçini Ermənistana qaytarıb. Ermənistana qaytarılan şəxslər ötən ilin noyabrın 10-da imzalanmış razılaşmadan sonra Qarabağda tərksilah edilərək tutulublar.

Qeyd olunmuşdu ki, araşdırma zamanı onlar Azərbaycan hərbçilərinin həlak olması və yaralanması ilə nəticələnən əməliyyatlarda iştirakları təsdiqlənməyib.

Yanvarın 9-da Xarici İşlər Nazirliyi Azərbaycanın işğaldan azad edilmiş ərazilərində Ermənistan tərəfindən məqsədyönlü şəkildə yerləşdirilmiş 62 nəfərdən ibarət erməni terrorçu-diversant qrupu saxlanılaraq istintaqa təhvil verilməsi ilə bağlı məlumat yayıb.

Lakin bəzi beynəlxalq qurumlar həmin şəxsləri «hərbi əsir» hesab edir və rəsmi Bakını onları Erməniatana qaytarmağa çağırır.

Hazırda Azərbaycanda səfərdə olan Rusiya Xarici işlər naziri Sergey Lavrov mayın 6-sı Ermənistana səfəri zamanı mətbuat konfransında bildirib ki, rəsmi şəxslərlə Dağlıq Qarabağ ətrafında vəziyyəti müzakirə olunub. «Bütün saxlanılanların evə qaytarılmasına, ərazilərin minalardan təmizlənməsinə, mədəni və dini irsin qorumasına yönəlmiş səylərini davam etdiririk».

Sözügedən şəxslər Ermənistana qaytarılacaqmı?

Mayın 10-da Prezident İlham Əliyev Rusiya XİN rəhbəri Sergey Lavrovu qəbul edərkən bildirib ki, Azərbaycan humanitar problemlərlə bağlı məsələlərdə xoş məram nümayiş etdirir. «Deməliyəm ki, hərbi əməliyyatlar başa çatandan sonra biz müharibənin yekunlarına əsasən bizdə olan bütün hərbi əsirləri vermişik».

Dünən Baş Prokuror Kamran Əliyev isə jurnalistlərə bildirib ki, Qarabağda vuruşmuş erməni terrorçularının hər biri ilə bağlı konkret cinayət işləri var və ittihamlar irəli sürülüb. «Bunlardan biri - Livan vətəndaşı ilə bağlı cinayət işi Bakı Hərbi Məhkəməsinə göndərilib… Digər terrorçularla bağlı cinayət işi də yekunlaşmaq üzrədir».

Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov Turana bildirib ki, Azərbaycan mövqeyi beynəlxalq hüquqa söykənən mövqedir. «Beynəlxalq hüquqda əsir, terrorçu və diversant definisiyası var. Bunların hər birinin hüquqi baxımından əsaslandırılmış adı var. Nəzərə alsaq ki, Azərbaycan hərbçilərinə və mülki əhalisinə hücum edənlər bunu 2020-ci ilin noyabrın 10-da Azərbaycan, Rusiya və Ermənistan siyasi liderləri imzaladığı birgə bəyanatla müharibəyə son qoyulandan sonra ediblər, onlar artıq hərbçilər sayılmır. Onlar terrorçu və diversant sayılırlar».

Deputat qeyd edib ki, həmin 62 saxlanmış şəxsləri Ermənistan beynəlxalq ictimaiyyətə hərbi əsir kimi təqdim etmək istəyir. «Güya ki, Azərbaycan hərbi əsirləri geri qaytarmaq istəmir və beynəlxalq hüquqa hörmətsizlik edir. Bu tamamilə yalandır. Həmin şəxslər məhz beynəlxalq hüquqa görə birmənalı terrorçu və diversantdılar. Azərbaycan 3 nəfəri azad etdi, onların da mülki əhaliyə və hərbçilərimizə qarşı hər hansı cinayətkar əməli törətməyi təsdiqini tapmayıb».

Komitə üzvü vurğulayıb ki, Ermənistan Rusiyaya şikayət edir. «Eyni zamanda Ermənistan tərəfi beynəlxalq aləmdəki havadarlarına şikayətlər edirlər. Fransa Senatının rəhbərliyi Ermənistana gəlir və bəyanatının bir cümləsi erməni «hərbi əsirlərin» azad olunması ilə bağlıdır».

E.Nəsirovun fikrincə burada ikili standartlarla yanaşma nümayiş etdirilir. «Belə olan vəziyyətdə Azərbaycan tərəfinin da tələbləri var. Bu qədər «hərbi əsir» məsələsini qaldırırlar, bəs niyə onda 100-dən çox mülki əhalimizin minaya düşüb həlak olmasının səbəbi olan minalanmış ərazilərin xəritəsinin Azərbaycana verilməməsi barədə danışmırlar? Niyə Birinci Qarabağ müharibəsi zamanı Ermənistan tərəfindən əsir götürülmüş 4 min soydaşlarımızın taleyi barədə heç bir məlumat verilməməsi barədə niyə bir söz demirlər? Nə baş verir? Bu nə ikili standartlardır?»

Politoloq Ərəstun Oruclu isə AzadlıqRadiosuna bildirib ki, Azərbaycan hakimiyyətinin Qarabağ münaqişəsindən sonrakı dövrdə verdiyi bəyanatlar və addığı addımlar bir birinə diametral ziddiyət təşkil edir. «Həmin diversantlarla bağlı da vəziyyət eyni cürdür. Hüquq mühafizə orqanları tərəfindən bəyan olunmuşdu ki, 10 noyabr üçtərəfli bəyanatından sonra Azərbaycan ərazisində saxlanılan erməni silahlıları hərbi əsir statusu almırlar, onlar diversant kimi mühakimə olunacaqlar. Amma indi biz tamamilə başqa mənzərə görürük».

Ekspert qeyd edib ki, bu mənzərə Livan vətəndaşı olan və snayper olduğu deyilən Maral Nazaryandan başladı. «Livan hökümətinin müraciəti ilə Azərbaycan onu azad elədi, indi da bu üç nəfəri azad etdi».

Ə.Oruclunun fikrincə, belə gedişlə asta-asta hamısını azad edəcəklər. «Sonuncu 3 nəfərdən birinin azad olunmasına görə Beynəlxalq Cüdo Federasiyasının prezidenti İlham Əliyevə təşəkkürünü bildirdi. İlham Əliyev də kimdənsə sağ ol eşitmək xatirinə bu terrorçuları hamısını təhvil verəcək».

Politoloq vurğulayıb ki, burada iki hərəkət görmək olar. «Azərbaycanın daxili auditoriyaya yönəlik popilist bəyanatlar və xarici auditoriyanın tələbi ilə həyata keçirilən addımlar. Konkret olaraq isə bu diversantların təhvil verilməsi».

Ekspert hesab edir ki, Azərbaycan birtərəfli qaydada çox məsələlərdə güzəştə gedəcək. «İlk növbədə də bu diversantlar məsələsində. Ardınca isə biz başqa güzəştlərin şahidi ola bilərik».