ABŞ Azərbaycan və Ermənistan arasında münasibətlərin gərginləşməsindən “narahatdır” və gərginliyin artmasının qarşısını almağa “çalışır”

Vaşinqton/28.09.20/Turan: ABŞ Dağlıq Qarabağ münaqişəsi zonasında təmas xətti boyunca böyük itkilərə, o cümlədən mülki əhali arasında itkilərə səbəb olan genişmiqyaslı hərbi əməliyyatlar haqqında xəbərlərdən narahatdır. Bu barədə Dövlət Departamentinin bəyanatında deyilir.

Ağ Evin mətbuat üçün brifinq zalında jurnalistlər qarşısında çıxış edən prezident Donald Tramp deyib ki, onun administrasiyası gərginliyin artmasını dayandırmaq üçün nə edə biləcəklərini araşdırır.

“Buna çox ciddi baxırıq. Bu regionda çox yaxşı münasibətlərimiz var, görək, bunu dayandıra biləcəyikmi”, deyə o bildirib.

Elə bu gün dövlət katibinin müavini Stiven Biqan Azərbaycan və Ermənistan xarici işlər nazirlərini “döyüş əməliyyatlarını dərhal dayandırmağa, gərginliyin artmasının qarşısını almaq üçün mövcud birbaşa rabitə kanallarından istifadə etməyə, həmçinin gərginliyi daha da artıracaq ritorika və əməllərdən çəkinməyə” çağırıb.

“Tərəfləri mümkün qədər tez danışıqlara qayıtmaq üçün Minsk Qrupunun həmsədrləri ilə işləməyə çağırırıq. ATƏT-in Minsk Qrupunun həmsədri qismində Birləşmiş Ştatlar dinc və sabit nizamlanmaya nail olmaqda tərəflərə kömək etmək qərarına sadiqdir”, deyə bəyanatda qeyd edilir.

Öz növbəsində, ABŞ-ın Demokrat Partiyasından prezidentliyə namizəd və keçmiş vitse-prezident Co Bayden hərbi əməliyyatların geniş münaqişəyə çevrilə biləcəyini bildirib və Tramp administrasiyasını atəşkəs xətti boyunca müşahidəçilərin sayının artırılmasına şərait yaratmağa çağırıb. O, həmçinin Rusiyanı “həyasızcasına hər iki tərəfə silah göndərməyə son qoymağa” çağırıb.

Elə həmin gün Ağ Evin milli təhlükəsizlik üzrə müşaviri Robert O’Brayen bu münaqişənin hərbi həll yolunun olmadığını qeyd edib. “Bu zorakılığa indi, daha çox həyat itirilmədən son qoyulmalıdır”, deyə o qeyd edib. -25В-