ABŞ Azərbaycanı dini etiqad azadlığına nəzarət siyahısına salıb

Vaşinqton/05.01.24/Turan: Cümə axşamı ABŞ Azərbaycanı dini azadlıqların ciddi pozuntusuna yol verən ölkələrin xüsusi siyahısına salıb. Bu, potensial olaraq ABŞ hökuməti tərəfindən sanksiyalar üçün yol açır, bu barədə Turan-ın Vaşinqtondakı müxbiri bildirib.

İllik siyahını açıqlayan dövlət katibi Entoni Blinken ötən ilin qara siyahısında olan 12 ölkənin hamısının - Birma, Çin, Kuba, ÇXDR, Eritreya, İran, Nikaraqua, Pakistan, Rusiya, Səudiyyə Ərəbistanı, Tacikistan və Türkmənistanı siyahıda saxladığını qeyd edib.

"Bundan başqa, mən Əlcəzair, Azərbaycan, Mərkəz Afrika Respublikası, Komor Adaları və Vyetnamı dini etiqad azadlığının ciddi pozuntularına yol verən ölkələr adlandırdım", deyə o, öz bəyanatında bildirib.

Blinken həmçinin "xüsusi narahatlıq" doğuran təşkilatlar kimi "Əş-Şəbab", "Boko Haram", "Hayyat Tahrir əş-Şam", husitlər, İŞİD-Sahel, İŞİD-Qərbi Afrika, "Əl-Qaidə"nin filialı Camaat Nəsr əl-İslam vəl-Muslimin və Talibanı sadalayıb.

"Hökumətlər dini azlıqların icmalarına və ziyarətgahlarına hücumlara, fikirlərin dinc şəkildə ifadəsinə görə həbslərə, transmilli repressiyalara və dini icmalara qarşı zorakılıq çağırışlarına son qoymalıdırlar", deyə Blinken qeyd edib.

Amerikanın dini etiqad azadlığı üzrə qurumu - USCIRF öz bəyanatında Azərbaycanın nəzarət siyahısına daxil edilməsini "alqışlayıb". Ötən ay USCIRF yeni hesabat dərc edib. Hesabatda deyilir ki, Azərbaycan hökuməti "Azərbaycanın insan hüquqları sahəsində beynəlxalq öhdəliklərini pozan qanunlarda və siyasətdə islahat aparmaqda maraqlı deyil".

USCIRF-in məlumatına görə, son üç ildə Azərbaycan hökuməti din haqqında qanuna iki dəfə düzəliş edərək, müxtəlif növ dini fəaliyyətlərə yeni məhdudiyyətlər gətirib.

Məruzədə həmçinin Dağlıq Qarabağdakı dini obyektlər, şiə dini fəallara qarşı repressiyalar və hökumətin dini əqidəyə görə hərbi xidmətdən imtina tətbiq etmək istəməməsi ilə bağlı narahatlıq ifadə olunur.

"İl ərzində hakimiyyət müntəzəm olaraq şiə müsəlmanları təqib etməyə, cərimə etməyə, saxlamağa və həbs etməyə davam edib", deyə məruzədə qeyd edilir. 0