ABŞ Dneprə endirilən raket zərbəsini qınayır və Ukraynanın hava hücumundan müdafiəsini gücləndirir

Vaşinqton/18.01.23/Turan: Çərşənbə axşamı Ağ Ev Rusiyanın Dneprdə yaşayış binasına ən az 45 nəfərin ölümü və onlarla insanın yaralanması ilə nəticələnən raket zərbəsini "barbarlıq" adlandırıb və məsuliyyətə çağırıb, xəbəri Turan-ın müxbiri verib.

"Biz Rusiya qüvvələrinin törətdikləri vəhşiliklərə, habelə hərbi cinayətlərə görə məsuliyyətə cəlb edilməsi istiqamətində işimizi davam etdirəcəyik", deyə mətbuat katibi Karin Jan-Pyer mətbuat üçün brifinqdə bildirib.

Onun sözlərinə görə, ruslar "Ukrayna xalqının gücünü, cəsarətini və qətiyyətini layiqincə qiymətləndirmir". Bu şərh prezident Baydenin Niderland baş naziri Mark Ryutte ilə görüşündə səslənib. İki dövlət başçısı görüşdə "Rusiyanın hərbi cinayətlərə görə məsuliyyətə cəlb edilməsi üzrə səyləri" müzakirə ediblər, deyə Ağ Evin məlumatında bildirilir.

Baş nazir Ryutte Niderlandın Ukraynaya Patriot raket hücumundan müdafiə sistemləri göndərməyi planlaşdırdığını təsdiq edib. "Biz sizin Almaniya ilə birlikdə Patriot HHM sistemi ilə bağlı etdiklərinizə qoşulmaq niyyətindəyik

Bizim buna qoşulmağımız vacibdir və mən bu gün bunu kansler Olaf Şoltsla müzakirə etdim", deyə o bildirib.

Bayden həmçinin Almaniya kansleri Şoltsla Ukraynaya kömək haqqında danışıb. "Liderlər Ukraynaya davamlı dəstəyi müzakirə ediblər və Rusiyanın təcavüzünü qınayıblar", deyə Ağ Evin məlumatında bildirilir.

Bu arada, bu həftə Ukrayna qoşunları Oklahoma ştatının Fort-Sill məntəqəsinə gəliblər və Patriot raket kompleksi ilə bağlı təlimlərə başlayıblar, çərşənbə axşamı Pentaqon bu məlumatı təsdiq edib.

"Təlim başlayıb, deyə Pentaqonun briqada generalı Pet Rayder bildirib. - Təlim bir neçə ay davam edəcək, 90-100 ukraynalıya Patriot raket kompleksindən istifadə təlimi veriləcək", deyə o əlavə edib. 0