ABŞ Dövlət Departamenti: Blinken və Əliyev Qarabağda vəziyyəti müzakirə ediblər

Vaşinqton/06.09.23/Turan: Ötən həftə ABŞ dövlət katibi Entoni Blinken "Dağlıq Qarabağda humanitar vəziyyətin pisləşməsilə bağlı ABŞ-ın narahatlığını ifadə etmək üçün" Azərbaycan prezidenti İlham Əliyevlə telefonla danışıb, çərşənbə günü Dövlət Departamentinin məlumatında deyilir.

Sentyabrın 1-də telefon danışığı zamanı Blinken "Azərbaycandan əlavə marşrutların vacibliyini etiraf edərək Laçın dəhlizini humanitar, kommersiya və sərnişin daşımaları üçün yenidən açmaq çağırışımızı təkrarlayıb",- Dövlət Departamentinin mətbuat katibi Metyü Miller deyib.

Blinken “dialoq və kompromisin, həmçinin tərəflər arasında inamın möhkəmləndirilməsinin vacibliyini” vurğulayıb. "O, ABŞ-ın sülh prosesinə dəstəyini davam etdirəcəyini vəd edib”, - Miller deyib.

Öz növbəsində Azərbaycan Prezidentinin mətbuat xidməti məlumat verib ki, telefon söhbəti zamanı Ağdam-Xankəndi və Laçın-Xankəndi yollarının açılması ilə bağlı məsələlər ətrafında fikir mübadiləsi aparılıb.

Əliyev vurğulayıb ki, Ermənistan və onun Azərbaycanın Qarabağ bölgəsində yaratdığı və dəstəkləməkdə davam etdiyi qondarma separatist rejim Ağdam-Xankəndi yolunun açılmasına qərəzli şəkildə imkan vermir və bu yoldan istifadənin qarşısının alınması üçün süni maneə və əngəllər yaradır, Beynəlxalq Qırmızı Xaç Komitəsinin xətti ilə bu yol ilə yüklərin daşınması barədə əldə olunmuş ilkin razılaşmadan imtina edib.

Azərbaycan Prezidenti qeyd edib ki, Ağdam-Xankəndi yolundan istifadədən bu formada imtina etmək siyasi manipulyasiyadır və həmin ərazidə guya humanitar, yaxud qida böhranının yaşandığını iddia etmək üçün məqsədyönlü yalandır. Ağdam-Xankəndi yolunun açılmasından sonra Azərbaycanın gömrük və sərhəd-nəzarət rejimi qaydaları tətbiq edilməklə Laçın-Xankəndi yolu açıla bilər.

İlham Əliyev qeyd edib ki, Azərbaycan tərəfi ilə razılaşdırmadan Ermənistan tərəfindən Azərbaycanın “Laçın” sərhəd-keçid məntəqəsinin qarşısına humanitar təyinatlı olduğunu iddia etdikləri yüklərin gətirilməsi Azərbaycanın daxili işlərinə qarışmaqdır, ölkəmizin ərazi bütövlüyünə və suverenliyinə hörmətsizlikdir.

Azərbaycan Qızıl Aypara Cəmiyyətinin xətti ilə həmin əraziyə ərzaq yüklərinin çatdırıldığını, lakin qanunsuz separatist rejimin bundan imtina etdiyini bildirib.

Qarabağın erməni əhalisinin nümayəndələrinin reinteqrasiya məsələləri ilə bağlı müzakirələrin aparılması üçün paytaxt Bakıya və ölkəmizin digər şəhərlərinə dəvət edilməsinə baxmayaraq, onların bundan imtina etdiklərini xatırladıb.-0-