ABŞ Dövlət katibi Azərbaycan Prezidenti ilə Laçın-Xankəndi yolu ətrafındakı vəziyyətİ müzakirə edib

Bakı/21.03.23/Turan: Amerika Birləşmiş Ştatlarının Dövlət katibi Antoni Blinken martın 21-də Azərbaycan Prezidenti İlham Əliyevə zəng edib.

TURANın Vaşinqtondakı müxbirinin verdiyi məlumata görə, ABŞ Dövlət Departamentinin bəyanatında deyilir ki, ABŞ dövlət katibi Ermənistan və Azərbaycan arasında ikitərəfli sülh danışıqlarının asanlaşdırılmasında ABŞ-ın  yardımını təklif edib. 

Blinken “həll olunmamış problemlərin həlli yollarını axtarmağa çağırıb və konfliktin hərbi həllin olmadığını vurğulayıb”, - Dövlət Departamentinin mətbuat katibi Vedan Patel  bildirib

Dövlət katibi “Laçın dəhlizin kommersiya və şəxsi avtomobillər üçün açılmasının vacibliyini təsdiqləyib.

Blinken bazar ertəsi Ermənistanın baş naziri Nikol Paşinyanla danışıb və həmçinin ABŞ-a Azərbaycanla ikitərəfli sülh danışıqlarının aparılmasında yardım təklif edib.

Öz növbəsində  Azərbaycan prezidentinin mətbuat xidmətinin məlumatına görə, telefon danışığı əsnasında Azərbaycanın Laçın-Xankəndi yolu ətrafındakı vəziyyət müzakirə olunub.

Dövlət başçısı qeyd edib ki, ötən il dekabrın 12-dən bu günədək Rusiya sülhməramlılarının və Beynəlxalq Qırmızı Xaç Komitəsinin xətti ilə buradan 4700-dən artıq nəqliyyat vasitəsinin, tibbi yardıma ehtiyacı olan şəxslərin və onları müşayiət edənlərin keçidi təmin olunub.

“Buna görə də bu yolun guya blokadada olması barədə məlumat Ermənistanın yalançı təbliğatıdır. Ermənistanın Laçın yoluna köməkçi yoldan istifadə edərək Rusiya sülhməramlılarının müvəqqəti yerləşdirildiyi ərazilərimizdə qanunsuz hərbi daşımalar, şəxsi heyətin rotasiyasını həyata keçirməsi, habelə Ermənistan silahlı qüvvələrinin 10 minə yaxın hərbçisinin hələ də Azərbaycan ərazisində olması ciddi narahatlıq doğurur. Bu xüsusda dövlət başçısı Azərbaycanın Laçın yolunun Ermənistanla sərhədinin son nöqtəsində sərhəd-keçid məntəqəsinin yaradılmasının labüdlüyünü xüsusilə vurğulayıb”.

Məlumatda deyilir ki, İlham Əliyev son həftələr ərzində Ermənistan tərəfinin Avropa İttifaqının bu ölkədəki missiyasının yerləşməsindən sui-istifadə edərək vəziyyəti qəsdən gərginləşdirmək istiqamətində siyasət yürütdür, Azərbaycan-Ermənistan dövlət sərhədi boyu və Rusiya sülhməramlılarının müvəqqəti yerləşdirildiyi Azərbaycan ərazilərində Ermənistan silahlı qüvvələri və qanunsuz erməni hərbi birləşmələri tərəfindən atəşkəsin intensiv şəkildə pozulması hallarının müşahidə olunduğunu diqqətə çatdırıb.

“Azərbaycan Prezidenti bu xüsusda 2023-cü il martın 5-də qeyri-qanuni erməni birləşmələrinin törətdikləri təxribat nəticəsində 2 hərbi qulluqçumuzun şəhid olmasını və Novruz bayramı günü - martın 20-də Azərbaycan-Ermənistan dövlət sərhədinin Zəngilan rayonu ərazisindən keçən hissəsində Ermənistanın növbəti təxribatı nəticəsində Dövlət Sərhəd Xidmətinin hərbi qulluqçusunun yaralandığını qeyd edib”, mətbuat xidməti qeyd edib.

İlham Əliyev vurğulayıb ki, Azərbaycan sülh gündəliyinə tam sadiqdir, Ermənistanla münasibətlərin normallaşdırılmasına və tezliklə sülh müqaviləsinin imzalanmasına hazırdır, son təklif və düzəlişlərinin olduğu sülh müqaviləsinin mətnini Ermənistan tərəfinə təqdim edib.

Əliyev  bildirib ki, ABŞ və şəxsən dövlət katibi Antoni Blinkenin bu istiqamətdə səylərini yüksək qiymətləndirir. Münxendə keçirilmiş görüşün davamı olaraq Azərbaycanın Qarabağdan olan erməni sakinlərlə təmaslara hazır olduğunu və bu xüsusda Azərbaycan Prezidentinin Administrasiyası tərəfindən reinteqrasiya üzrə təmasları davam etdirmək və infrastruktur layihələrini müzakirə etmək üçün onların Bakıya dəvət edildiyini xatırladıb.-0-