ABŞ Dövlət Katibinin Köməkçisinin müavini ictimai və siyasi fəallarla görüşüb

Bakı/14.06.22/Turan: Azərbaycana səfəri çərçivəsində ABŞ Dövlət Katibinin Köməkçisinin Demokratiya, İnsan Haqları və Əmək məsələləri üzrə müavini Kara Makdonald iyunun 13-də səfir Li Litzenberger və Azərbaycanın vətəndaş cəmiyyəti təmsilçiləri, o cümlədən fəallar, hüquqşünaslar, jurnalistlər, həmçinin siyasi partiya nümayəndələri ilə görüşüb. Bu barədə ABŞ-ın Azərbaycandakı Səfirliyi məlumat yayıb.

Məlumatda deyilir ki, xanım Makdonald ABŞ-ın bu gün ifadə, toplaşma və birləşmək azadlıqları da daxil olmaqla, əsas hüquq və azadlıqlara hörmətin gücləndirilməsi, habelə demokratik proseslərin inkişafı üçün görülən səylərin dəstəklənməsində azərbaycanlıların yanında olduğunu qeyd edib.

Öz növbəsində, ictimai fəal Bəxtiyar Hacıyev bildirib ki, Dövlət Katibinin köməkçisnin müavini ilə kifayət qədər açıq, səmimi və ətraflı görüşü olub. O qeyd edib ki, ölkədə ayrı-ayrı fərdlərə və qruplara qarşı baş vermiş insan hüquqları problemləri ilə bağlı məlumat verib.

“Həm gələcəkdə baş verə biləcək risklərlə bağlı müzakirəmiz oldu, həm də ABŞ Administrasiyasının keçmişdə etdiyi səhvlər və indi atdığı doğru addımlarla bağlı səmimi fikir mübadiləmiz oldu. Xanım Makdonald da prezident Baydenin insan hüquqları və demokratiyanın xarici siyasətdə xüsusi yer tutduğu barədə fikrini çatdırıb", deyə o qeyd edib.

Makdonaldın Azərbaycana səfəri iyunun 15-dək davam edəcək. -0-