ABŞ Ermənistanın yalan rəvayətlərini təkrarlamamalıdır”

Bakı/16.09.23/Turan: Sentyabrın 16-da Azərbaycanın xarici işlər naziri Ceyhun Bayramov ABŞ Dövlət Departamentinin Qafqazda danışıqlar üzrə baş məsləhətçisi Lui Bono ilə görüşüb.

Görüşdə regiondakı vəziyyət, Azərbaycan və Ermənistan arasında normallaşma və sülh prosesi, mövcud təhdid və çağırışlar müzakirə olunub, Azərbaycan Xarici İşlər Nazirliyinin mətbuat xidməti bildirib.

Bayramov qeyd edib ki, sentyabrın 1-də Azərbaycan prezidenti İlham Əliyev və ABŞ dövlət katibi Entoni Blinken arasında danışıq zamanı Ağdam-Xankəndi və Laçın yolunun eyni zamanda açılması barədə əldə olunmuş razılığın həyata keçirilməsinə əngəl törədən tərəf Ermənistan və onun yaratdığı qondarma rejimdir. O əlavə edib ki,  bu fakt bölgədə guya “humanitar böhran”, “blokada” olması ilə bağlı səsləndirilən iddiaların əksinə, vəziyyətin heç də humanitar deyil, əslində siyasi olduğuna dəlalət etdiyini bir daha göstərir.

Bayramov Ermənistan tərəfinin davamlı hərbi-siyasi təxribatlarına, bütün dünyada Azərbaycan əleyhinə qarayaxma kampaniyası aparmasına, ərazilərimizdə separatçılığı dəstəkləməsinə baxmayaraq, ölkəmizin konstruktiv mövqe sərgiləməsinin fonunda bölgədəki vəziyyətlə yaxından tanış olan bir sıra beynəlxalq tərəfdaşların, o cümlədən ABŞ tərəfinin Ermənistanın rəvayətlərinə uyaraq erməni tərəfinin iddialarını təkrarlamasının qəbuledilməz olduğunu bildirib.

Bununla əlaqədar Bayramov ABŞ dövlət katibinin köməkçisi Yuri Kimin çıxışında (ABŞ Senatında) hələ də bütün silahlı qüvvələrini Azərbaycan ərazisindən çıxarmayan Ermənistanın əsassız iddialarının əksini tapmasından təəssüfləndiyini bildirib.

ABŞ tərəfilə 1 sentyabr razılığına uyğun olaraq yolların paralel açılmasına Ermənistan və qondarma rejimin maneçilik törətməsinin Senatda ABŞ rəsmisi tərəfindən bəyan edilməməsi vəziyyətə dair yanlış təəssürat yaradıb.

Bununla yanaşı, Bayramov Azərbaycanın yolların paralel istifadəsi üzrə razılaşmaya sadiqliyini təsdiqləyib.

Görüş zamanı qarşılıqlı maraq doğuran digər məsələlər ətrafında da fikir mübadiləsi aparılıb.06B