ABŞ Gürcüstana nümayəndə heyəti göndərir, Türkiyə ilə danışıqlar aparır və Ukraynanı silahlandırır

Vaşinqton/17.05.22/Turan: ABŞ bu həftə Gürcüstana və Moldovaya nümayəndə heyəti göndərəcək, bu barədə Turan-ın Vaşinqtondakı müxbiri bildirib.

ABŞ nümayəndə heyətinə Dövlət Departamentinin müşaviri Derek Çollet rəhbərlik edəcək. O, Moldovada dövlət məmurları ilə görüşməyi və "ABŞ-ın Moldovada demokratiya və təhlükəsizliyə dəstəyini gücləndirməyi" planlaşdırır, deyə Dövlət Departamentinin məlumatında qeyd edilir.

Daha sonra Çollet Gürcüstana səfər edəcək, "Gürcüstanın bəzi hissələrində Rusiyanın davam edən işğalının müzakirəsi üçün hökumət, müxalifət və vətəndaş cəmiyyəti nümayəndələri ilə görüşəcək" və "Gürcüstanın demokratik və Avroatlantik gələcəyi" ilə bağlı məsələləri müzakirə edəcək, deyə məlumatda bildirilir.

Vaşinqtonda dövlət katibinin müavini Vendi Şerman bazar ertəsi Türkiyə xarici işlər nazirinin müavini Sedat Önalla görüşüb. Tərəflər Türkiyə və ABŞ arasında strateji münasibətləri təsdiq ediblər, ikitərəfli əməkdaşlığın bir çox aspektlərini müzakirə ediblər.

Şerman "Türkiyənin Ukraynaya qətiyyətli və güclü dəstəyinə görə" Önala təşəkkürünü bildirib, Rusiyanın Ukraynaya təcavüzünə qarşı mübarizədə müttəfiqlər və NATO-dan olan tərəfdaşlar arasında həmrəyliyin zəruriliyini müzakirə edib.

Görüş Ankaranın kürd döyüşçüləri dəstəklədiklərinə görə İsveç və Finlandiyanın NATO-ya daxil olmalarını dəstəkləməyəcəyini bəyan etməsindən sonra baş tutub.

Pentaqonun rəsmi nümayəndəsi Con Kirbi jurnalistlərlə söhbətində bildirib ki, Vaşinqton "bunun üzərində işləyir".

Pentaqon həmçinin bazar ertəsi bildirib ki, ABŞ-ın təqdim etdiyi 155 mm yedəkli M777 haubitsaları və müttəfiqlərinin və tərəfdaşlarının Ukraynaya təqdim etdiyi digər növlər "döyüş meydanında böyük təsir göstərir".

"Artıq görürsünüz ki, ukraynalılar Donbasda əks hücuma keçməyə hazırdırlar. Onlar rusların keçmişdə ələ keçirdiyi bəzi şəhərləri qaytarırlar", deyə Müdafiə Nazirliyinin yüksək vəzifəli nümayəndəsi bildirib. -25B-