ABŞ Rusiyanın BMT-nin əsas dəyərlərinə hücumunun qlobal səviyyədə qınanmasına nail olmağa çalışır

Vaşinqton/17.05.22/Turan: Bazar ertəsi ABŞ-ın BMT-dəki yüksək vəzifəli diplomatı "Rusiyanın BMT Nizamnaməsinin əsas dəyərlərinə hücumunu" qınamağa çağırıb, bu barədə Turan-ın Vaşinqton müxbiri məlumat verib.

"Rusiyanın etdiyi BMT Nizamnaməsinin əsas dəyərlərinə hücumdur, suveren ölkənin müstəqilliyinə hücumdur. O, ölkənin sərhədlərini dəyişdirməyə çalışır. Bu, bizim hamımızı maraqlandırır", bu barədə ABŞ-ın BMT-dəki nümayəndəsi Tomas-Qrinfild Dövlət Departamentinin təşkil etdiyi brifinqdə Turan-ın suallarını cavablandırarkən bildirib.

"Hər bir ölkənin Rusiyanın onların qınağını və narahatlığını eşitdiyindən əmin olması çox vacibdir. Bu, sizin ölkənizə də, bütün digər ölkələrə də aiddir", deyə o, Turan-ın müxbirinin Rusiya-Ukrayna müharibəsinin nəticələrinin Azərbaycan üçün hansı təhdidləri doğurduğu haqqında sualına cavabda bildirib.

Artıq reallaşan təhdidə gəlincə, bu, ərzaq təhlükəsizliyi problemidir, çünki davam edən müharibə ilə əlaqədar Ukrayna taxılını dünya bazarına qaytarmaq mümkün olmur.

"Bizim hesablaşmalı olduğumuz acı həqiqət ondan ibarətdir ki, bütün dünyada insanlar ac qalır, baxmayaraq ki, kifayət qədər çox yemək var. Müharibəni qızışdıranlar qəsdən aclıqdan müharibə silahı kimi istifadə edirlər", deyə o bildirib.

Əvvəllər Ukrayna inkişaf etməkdə olan dünyanın taxıl mənbəyi idi. Rusiya limanları bloklamağa və vətəndaş infrastrukturunu və taxıl anbarlarını məhv etməyə başladıqdan sonra Afrika və Yaxın Şərqdə aclıq daha da dəhşətli olub.

"Bu, bütün dünya üçün böhrandır və buna görə o, BMT-yə aiddir. Biz ailələrini necə dolandıracağını bilməyən milyonlar qarşısında məsuliyyət daşıyırıq", deyə o əlavə edib.

Səfir həmçinin bildirib ki, Ukraynada ən mühüm ərzaq yollarının açılması üçün Rusiya ilə danışıqlar aparılır. "Hazırda bu dəhlizlərin necə açılacağını görə bilmək üçün müzakirələr aparılır", deyən səfir əlavə edib ki, BMT Baş Katibi Antoniu Quterriş bu məsələni Rusiya rəhbərliyi qarşısında qaldırıb. -25В-