ABŞ hərbi cinayətlərin sənədləşdirilməsi üçün Ukraynaya pilotsuz təyyarələr göndərəcək

Vaşinqton/28.07.23/Turan: Cümə axşamı ABŞ Ukraynadakı vəhşiliklərə görə rusiyalı hərbi cinayətkarların məsuliyyətə cəlb edilməsinə öz dəstəyini təsdiqləyib, Turan-ın Vaşinqton müxbiri bildirib.

"Rusiyanın Ukraynaya hücumu başlayandan prezident Co Bayden açıq şəkildə işarə etdi ki, Ukraynadakı müharibə cinayətlərinin və vəhşiliklərinin günahkarları və əlbirləri məsuliyyətə cəlb edilməlidir və Beynəlxalq Cinayət Məhkəməsinin istintaqı olmalıdır", - Dövlət Departamentinin rəsmi nümayəndəsinin müavini Vedan Patel gündəlik mətbuat brifinqində Turan-ın sualını cavablandırarkən deyib.

Onun sözlərinə görə, ABŞ-ın ədalət mühakiməsi sahəsində xüsusi tapşırıqlar üzrə səfiri Bet Van Şaak "bu prosesə dərindən cəlb olunub və fəal iştirak edir, təkcə dövlət katibilə yox, həm də idarələrarası səylər çərçivəsində sıx əməkdaşlıq etməyə davam edəcək".

"Biz günahkarların müəyyən edilməsi və məsuliyyətə cəlb edilməsi üçün bir sıra beynəlxalq səyləri, o cümlədən Ukrayna Baş Prokurorluğu, birgə istintaq qrupu, Birləşmiş Millətlər Təşkilatının insan hüquqları üzrə monitorinq missiyası və digərləri vasitəsilə səyləri dəstəkləyirik", - Patel əlavə edib.

Patelin şərhləri USAID Ukrayna Baş Prokurorluğuna 9 muxtar dronun göndərildiyini elan etdikdən sonra səslənib.

Amerikalı istehsalı olan Skydio dronlarından  Rusiyanın ehtimal edilən müharibə cinayətlərini sənədləşdirmək üçün istifadə ediləcək. 4K kameraları ilə təchiz edilmiş dronlar cəbhəyanı yaşayış məntəqələrində və azad edilmiş ərazilərdə dağıdılmış mülki infrastruktura və insan hüquqları pozuntularına dair sübutların sənədləşdirilməsinə kömək edəcək. 0