ABŞ hərbi əsirlərin azad edilməsini və Azərbaycan və Ermənistan arasında etimadın bərpa edilməsi tədbirlərini alqışlayır

Vaşinqton/08.12.23/Turan: Birləşmiş Ştatlar "Bakı və Yerevanın iki Azərbaycan və otuz iki Ermənistan hərbiçisinin azad edilməsi haqqında qərarını alqışlayıb", bu barədə Turan-ın Vaşinqtondakı müxbiri bildirib.

"Bu öhdəlik etimadın möhkəmləndirilməsi üzrə vacib tədbirdir, belə ki, ölkələr sülh sazişinin yekunlaşdırılması və münasibətlərin normallaşdırılması üzərində işləyir", deyə Dövlət Departamentinin mətbuat katibi Metyu Millər bildirib.

 "Sülh və Cənubi Qafqaz xalqlarının firəvan gələcəyi üçün zəmin yaradılması üzrə birgə səyləri üçün Azərbaycan prezidenti İlham Əliyevə və Ermənistan baş naziri Paşinyana təşəkkür edirik. Birləşmiş Ştatlar möhkəm və layiqli sülhün əldə olunması üzrə səyləri qətiyyətlə dəstəkləməyə davam edəcək".

Ermənistan və Azərbaycan cümə axşamı yaydıqları birgə bəyanatda hərbi əsirləri dəyişdirdiklərini və münasibətlərin normallaşdırılması üzərində işləyəcəklərini açıqlayıblar.

Daha əvvəl hər iki ölkə sülh sazişinin ilin sonuna qədər imzalana biləcəyini bildirmişdi, lakin Avropa və Vaşinqtonda bir neçə görüş ləğv edilib.

Cümə axşamı dövlət katibinin köməkçisi Ceyms O'Brayenin Bakıda keçirdiyi görüşlərdən sonra Dövlət Departamenti sülh danışıqlarının növbəti mərhələsinin keçirilməsində maraqlı olduğunu təsdiq edib.

O'Brayen "Azərbaycan prezidenti İlham Əliyevlə görüşü müsbət və konstruktiv" adlandırıb.

"O'Brayen prezident Əliyevə bildirib ki, Birləşmiş Ştatlar Azərbaycan Mərkəzi Bankının sədri və energetika nazirinin Vaşinqtona planlaşdırılan səfərlərindən məmnun olacaq və katib Blinken sülh danışıqlarının növbəti mərhələsi üçün Azərbaycanın xarici işlər naziri Ceyhun Bayramovu və Ermənistanın xarici işlər naziri Ararat Mirzoyanı Vaşinqtonda qəbuçl etmək fürsətini səbrsizliklə gözləyir", deyə Dövlət Departamentinin məlumatında bildirilir. 0