ABŞ-ın Azərbaycanda ərazilərin minalardan təmizlənməsinə yardımı 30 mln. dolları keçib - dövlət katibinin köməkçisi

Vaşinqton/03.04.20/Turan: 90-cı illərin sonlarından ABŞ Azərbaycana humanitar minalardan təmizləmə üçün 30 milyon dollardan çox vəsait ayırıb, bu barədə aprelin 2-də dövlət katibinin hərbi-siyasi məsələlər üzrə köməkçisi Klark Kuper bildirib.

Vaşinqtonda minalardan təmizləmə haqqında illik məruzəyə həsr edilmiş brifinqdə çıxış edən Kuper minalardan təmizləmə və adi silahların məhvi sahəsində ABŞ-ın qlobal liderliyini qeyd edib. 2019-cu ildə ABŞ 58 ölkədə adi silahların məhv edilməsi səylərini maliyyələşdirib.

Turan-ın müxbirinin ABŞ Administrasiyasının bu yaxınlarda Azərbaycanın Dağlıq Qarabağ regionunda minalardan təmizləmə işlərinin maliyyələşdirilməsini dayandırmasının doğru olub olmadığı haqqında sualına cavabda Kuper deyib ki, ərazilər minalardan azad edildikdə proqramlar dəyişir və bu ərazilərdə biz "daha çox təlimlə məşğul oluruq".

2021-ci maliyyə ilində ABŞ Administrasiyası bu məqsədlə bütün dünyada 240 milyon dollara yaxın vəsait ayırmağı planlaşdırır, deyə o qeyd edib.

1993-cü ildən etibarən ABŞ 100 ölkədə adi silahların məhv edilməsi və minalardan təmizləmə üçün 3,4 milyard dollardan çox vəsait ayırıb. -25B-