ABŞ konqresi korrupsiyaya uğramış xarici liderlər haqqında dinləmələr keçirir

Amerika qanunvericiləri və hüquq müdafiə təşkilatları korrupsiyaya qarşı mübarizə səyləri çərçivəsində beynəlxalq əməkdaşlığın gücləndirilməsi tədbirlərini və onun beynəlxalq səviyyədə insan hüquqlarına təsirini müzakirə edirlər.

Anqola, Nigeriya və bir sıra digər ölkələrlə birlikdə, Azərbaycan da yüksək korrupsiya və insan hüquqları sahəsində vəziyyətin pisləşməsi fonunda xüsusi narahatlıq yaradır.

“Azərbaycan hakim rejimin korrupsiyası haqqında danışmağın riskli olduğu yer olaraq qalır. Buna görə sizi həbs edə və yalan ittihamla həbsxanaya ata bilərlər”, deyə Human Rights Watch-un direktor müavini Con Sifton iyunun 16-da ABŞ Konqresinin insan hüquqları komissiyasının təşkil etdiyi xüsusi müzakirələrdə bildirib.

Bu yaxınlarda Panama sənədlərinin sızması göstərdi ki, Azərbaycanda yüksək səviyyəli vəzifəli şəxslərin, o cümlədən birinci şəxslərin iştirakı ilə böyük miqyasda korrupsiya qalmaqdadır, deyə o bildirib.

Hakimiyyət son vaxtlar beynəlxalq təzyiqlə əlaqədar onlarla fəalı azad etmək məcburiyyətində qaldı, deyən Sifton Qərb hökumətlərini bu təzyiqi davam etdirməyə çağırıb.

ABŞ Konqresinin dünyada korrupsiya səviyyəsinin azaldılması və insan hüquqlarının müdafiəsi üçün istifadə edə biləcəyi mühüm alətlərdən biri İnsan Hüquqları üzrə Qlobal Maqnitski Qanunudur.

Bu qanun insan hüquqlarını pozanların ABŞ-a yolunu bağlayacaq və ABŞ-da daşınmaz əmlakla bağlı sövdələşmələrinin qeydiyyatını qadağan edəcək.

Global Witness-dən Stefani Ostfeld də xarici dövlətlərin korrupsiyaya uğramış hökumət üzvlərinə qarşı bu qanunu tətbiq etməyə çağırıb.

“Biz korrupsionerlərin ayaqları altına qırmızı xalılar sərməyə son qoymalıyıq”, deyə o bildirib.

ABŞ-dan baş dairə hakimi Mark Volf qeyd edib ki, seçkili vəzifəli şəxslər – prezidentlər və ya nazirlər – insanları söz azadlığı hüququnu həyata keçirdiklərinə və korrupsiyanı ifşa etdiyinə görə öldürürsə, - cinayətkardırlar və beynəlxalq ictimaiyyətin nüfuzlu üzvləri olmamalıdır.

“Korrupsiya təqib və ya cəzalardan qorxmayan kleptokratik idarəçiləri olan bir çox ölkələrdə cəzasızlıq olduğuna görə mövcuddur, çünki onlar polis əməkdaşlarına, prokurorlara və məhkəmələrə nəzarət edir”, deyə o bildirib.

Konqressmen, İnsan Hüquqları üzrə Komissiyanın həmsədri Cim Makqovern bildirib ki, dünyada korrupsiyanın insan hüquqlarına təsiri getdikcə daha çox etiraf olunur. Son vaxtlar ABŞ-ın səyləri kleptokratiya və dövlət orqanlarında yüksək səviyyədə korrupsiya üzərində cəmlənib.

Obama administrasiyası korrupsiyaya qarşı mübarizə üzrə maliyyə şəffaflığı ilə bağlı əlavə öhdəliklər götürüb. “Biz kifayət qədər iş görürükmü, korrupsiya və insan hüquqlarının pozulması faktlarına adekvat reaksiya veririkmi? Bu komissiyanın vəzifələri bundan ibarətdir”, deyə o bildirib. -25В-