ABŞ Qarabağ münaqişəsində fəal bitərəfliyini təsdiq edir

Vaşinqton/24.10.20/Turan: Birləşmiş Ştatlar Dağlıq Qarabağla bağlı “fəal bitərəflik” siyasətinə sadiq qalacaq, bu barədə diplomatik mənbə cümə günü ABŞ-ın yüksək vəzifəli rəsmiləri və Ermənistan və Azərbaycan xarici işlər nazirləri arasında danışıqlardan sonra Turan-ın Vaşinqton müxbirinə bildirib.

Dövlət katibi Mayk Pompeo, Ağ Evin müşaviri Robert O’Brayen və spiker Nensi Pelosi nazirlər Ceyhun Bayramov və Zograb Mnatsakanyanı Azərbaycanın Dağlıq Qarabağ bölgəsində və onun ətrafında intensiv döyüşlərdən sonra “zorakılığa son qoymağa və dinc sakinləri qorumağa” çağırıb.

Hər iki nazir ayrı-ayrılıqda Dövlət Departamentində, Ağ Evdə (Milli Təhlükəsizlik Şurası) və Konqresdə olublar və bir-biri ilə ünsiyyətdən imtina ediblər, deyə Turan-ın müxbiri bildirib. Hətta xarici işlər nazirləri ilə ayrı-ayrı müzakirələr aparan ATƏT-in Minsk Qrupunun həmsədrləri onları bir araya gətirə bilməyib.

Pompeonun nazirlərlə görüşündən qısa müddət sonra Dövlət Departamenti öz bəyanatında “zorakılığa son qoymaq və dinc sakinləri qorumaq zərurətini qeyd edib”.

“Katib həmçinin münaqişənin Helsinki Yekun Aktının güc və ya güc təhdidinin tətbiq edilməməsi, ərazi bütövlüyü və bərabərlik və xalqların öz müqəddəratını təyin etməsi prinsipləri əsasında nizamlanması üçün tərəflərin ATƏT-in Minsk Qrupu həmsədrlərinin himayəsi altında konkret danışıqlara başlamasının vacibliyini qeyd edib”, deyə mətbuat katibi Morqan Ortaqus bildirib.

Bir qədər sonra Pompeo Tvitterdə yazıb ki, o və hər iki xarici işlər naziri zorakılığa son qoyulması üzrə “mühüm addımları” müzakirə ediblər. “Hər ikisi atəşkəsə riayət etməli və konkret danışıqlara qayıtmalıdır”, deyə o qeyd edib.

Öz növbəsində, prezident Trampın milli təhlükəsizlik üzrə müşaviri Robert O’Brayen günün ikinci yarısında bildirib ki, Bayramovla görüşdə o, “təcili atəşkəsdə, daha sonra isə Minsk Qrupunun yardımı ilə danışıqlara qayıdılmasında və sabitliyi daha da pozan xarici aktorlardan imtina edilməsində israr edib”.
O, “təcili atəşkəs və Minsk Qrupunun yardımı ilə Azərbaycanla danışıqlara qayıtma zərurətini müzakirə etmək üçün” Mnatsakanyanla görüşüb. “ABŞ münaqişə nizamlanana qədər bütün səviyyələrdə ən fəal diplomatik səylərini davam etdirəcək”.

Son diplomatik səyləri izləyən yüksək vəzifəli məmur Turan-ın Vaşinqton müxbiri ilə söhbətində anonimlik şərti ilə deyib ki, “Vaşinqton “bu müharibədə kiminsə tərəfini tutmur” və ədalətli vasitəçi olaraq “qərəzsizliyini qoruyub saxlayacaq”. -25-