ABŞ Rusiyanı ukraynalıların məcburi deportasiyasına son qoymağa çağırır

Vaşinqton/14.07.22/Turan: Çərşənbə günü Vaşinqton Rusiyanı Ukraynanın Rusiyanın nəzarəti altında olan rayonlarında sistemli məcburi deportasiyalara dərhal son qoymağa çağırıb, bu barədə Turan-ın Amerikadakı müxbiri xəbər verib.

"Qanunsuz deportasiya mülki şəxslərin qorunması haqqında dördüncü Cenevrə konvensiyasının ciddi pozuntusu və hərbi cinayətdir", deyə dövlət katibi Entoni Blinkenin bəyanatında bildirilir.

Məlumatlara görə, ruslar minlərlə ukraynalı uşağı övladlıq veriblər. ""Filtrasiya" əməliyyatlarının və məcburi deportasiyaların şahidləri və bu hadisələr zamanı sağ qalanlar Rusiyanın güc qurumları tərəfindən tez-tez işgəncələrə yol verildiyini bildiriblər", deyə Blinken qeyd edib.

Bu proses zamanı Rusiya hakimiyyəti mülki şəxslərin biometrik və şəxsi məlumatlarını toplayır və saxlayır, onları aqressiv şəkildə dindirir, Ukrayna vətəndaşlarını Rusiyada qalmağa razılığı imzalamağa məcbur edir.

"Müxtəlif mənbələrin, o cümlədən Rusiya hökumətinin qiymətləndirmələri göstərir ki, 900 000-dən 1,6 milyona qədər Ukrayna vətəndaşı, o cümlədən 260 000 uşaq dindirilib, saxlanılıb və zorla Rusiyaya - çox vaxt Uzaq Şərqdəki təcrid edilmiş regionlara deportasiya olunub", deyə Blinken qeyd edib.

"Prezident Putin və onun hakimiyyəti bu sistematik sui-istifadələrlə məşğul olub, cəzasız qala bilməz. Məsuliyyət mütləqdir", deyə o əlavə edib. "Ukrayna hakimiyyətinin və beynəlxalq hakimiyyətlərin bu vəhşiliklərin dəlillərinin yığılması, sənədləşdirilməsi və saxlanılması üzrə səylərini dəstəkləyirik. Biz hərbi cinayətlərdə və digər vəhşiliklərdə təqsirli olanları məsuliyyətə cəlb etməyə çalışırıq". 25B