ABŞ Ukraynaya 200 milyon dollarlıq yeni hərbi yardım göndərib

Vaşinqton/15.08.23/Turan: Bazar ertəsi Bayden administrasiyası Ukrayna üçün təxminən 200 milyon dollarlıq yeni hərbi yardım paketini elan edib, Turan-ın Vaşinqton müxbiri bildirib.

Bu, hava hücumundan müdafiə üçün hərbi sursatları, artilleriya mərmiləri, tank əleyhinə vasitələr və minalardan təmizləmə avadanlığını əhatə edən 44-cü yardım paketidir,

"Hər gün Rusiya Ukraynanın dinc vətəndaşlarını öldürür və mülki infrastrukturu məhv edir, həmçinin Ukraynanın mülki limanlarını və taxıl infrastrukturunu məhv edərək aclıqdan silah kimi istifadə edir", - dövlət katibi Entoni Blinkenin bəyanatında deyilir.

"Bu müharibəni Rusiya başladı və istənilən vaxt öz qoşunlarını Ukraynadan çıxararaq və amansız hücumları dayandıraraq onu bitirə bilər. Bu, baş verənə qədər ABŞ, müttəfiqlərimiz və tərəfdaşlarımız lazım olduğu qədər Ukrayna ilə birlikdə qalacaqlar",- Blinken deyib.

Bu açıqlama bazar ertəsi səslənib. Həmin gün məlum olub ki, prezident Bayden Rusiya təcavüzünü dəf etmək üçün Ukraynaya 24 milyard dollardan çox əlavə maliyyə ayırmağı planlaşdırır.

ABŞ təhlükəsizlik sahəsində yardımla yanaşı Ukraynaya iqtisadi və humanitar yardımın və NATO üzrə müttəfiqlərin maliyyələşdirilməsinə 110 milyard dollardan çox vəsait ayırıb. 0