ABŞ Ukraynaya hərbi dəstəyi davam etdirir və bu dəstəyi davam etdirəcəyini vəd edir

Vaşinqton/02.06.22/Turan: Çərşənbə günü ABŞ Rusiyanın Donbasdakı təcavüzünü dayandırmaq üçün Ukraynaya orta mənzilli müasir raket sistemlərinin və döyüş sursatlarının göndəriləcəyini bildirib, bu barədə Turan-ın müxbiri məlumat verib.

Pentaqon təhlükəsizlik sahəsində yeni tranşın 700 mln. dollar təşkil edəcəyini, Rusiya daxilindəki deyil, yalnız Ukraynadakı Rusiya qüvvələrinə zərbə endirmək üçün məhdud radiuslu mobil artilleriya raket sistemlərindən ibarət olduğunu qeyd edib.

"Ukrayna xalqı öz cəsurluğu və qətiyyəti ilə dünyanı ruhlandırmağa davam edir, öz ölkəsini və demokratiyasını Rusiya təcavüzündən qorumaq üçün cəsarətlə döyüşür. ABŞ Ukraynalı tərəfdaşlarımızı dəstəkləyəcək və Ukraynaya müdafiə üçün silah və texnika verməyə davam edəcək", deyə prezident Co Baydenin bəyanatında bildirilir.

Pentaqonun məlumatına görə, M142 HIMARS sistemi dəqiq idarə olunan raketlər buraxmağa imkan verir. Onlar artıq Avropaya göndərilib və Ukrayna hərbiçiləri onlardan istifadə təlimi alır. Pentaqonun fikrincə, təlim üç həftə davam edəcək.

Dörd ədəd HIMARS sistemindən əlavə olaraq, yeni yardım paketinə beş ədəd artilleriya əleyhinə radiolokasiya sistemi, iki ədəd hava müşahidə RLS, 1000 ədəd Javelin tank əleyhinə raket və onlar üçün 50 buraxma qurğusu, 6000 tank əleyhinə mərmi, 15 000 155 mm çaplı artilleriya mərmisi, dörd ədəd Mi-17 helikopteri, 15 ədəd taktiki maşın, həmçinin ehtiyat hissələri və avadanlıqlar daxildir.

Bu günə qədər ABŞ Ukraynaya 4,6 mlrd. dollarlıq yardım göstərib. 25B