ABŞ Usama ben Ladenin oğlu haqqında məlumata görə 1 milyon dollar mükafat elan edib

Vaşinqton/01.03.19/Turan: ABŞ "Əl-Qaidə" lideri Usama ben Ladenin oğlu haqqında məlumata görə 1 milyon dollar mükafat elan edib.

30 yaşlı Həmzə ben Laden islamçı döyüşçülərin əsas liderinə çevrilib, deyə Dövlət Departamentinin məlumatında bildirilir.

Son illər o, 2011-ci ildə atasının qətl edilməsinin qisasını almaq üçün ABŞ-a və onun Qərbdəki müttəfiqlərinə daim hücum etməyə çağıran audio və video məlumatlar yayıb.

"Hesab edirik ki, o, Əfqanıstan-Pakistan sərhədindədir və bəlkə də, İrana keçə bilər... Amma o, hər yerdə ola bilər", deyə ABŞ dövlət katibinin diplomatik təhlükəsizlik üzrə köməkçisi Maykl Evanoff cümə axşamı Vaşinqton mətbuat mərkəzində çıxış edərkən bildirib.

"Bugünki "Əl-Qaidə" bərpa olunur... Və ABŞ və müttəfiqlərimizi təhdid etməyə davam edir", deyə xüsusi tapşırıqlar üzrə səfir, ABŞ-ın terrorizmə qarşı mübarizə üzrə koordinatoru Natan Seyls bildirib. "Son illər bütün dünyanın diqqəti İŞİD təhdidi üzərində cəmləşib. Bu dövrdə "Əl-Qaidə" özünü nisbətən sakit aparıb, amma bu, kapitulyasiya deyil, strateji fasilədir. "Əl-Qaidə"nin bizə zərbə endirmək qabiliyyəti də, niyyəti də qalmaqdadır".

Turan-ın müxbirinin ABŞ hakimiyyətinin ehtimal olunan addımları haqqında sualına cavabda Seylz deyib ki, bütün növ təhdidlərə qarşı bütün mübarizə alətləri və tədbirləri, o cümlədən Əl-Qaidənin maliyyə resurslarından məhrum edilməsi tətbiq ediləcək. -25B-