ABŞ və Fransa Qarabağda möhkəm sülhə nail olmaqla bağlı “birgə addımları” müzakirə edib

Vaşinqton/15.07.21/Turan: Çərşənbə günü Fransa xarici işlər nazirinin Vaşinqtona səfəri zamanı ABŞ və Fransa digər mühüm məsələlərlə yanaşı, Dağlıq Qarabağ problemini də müzakirə edib, bu barədə Turan-ın Amerikadakı müxbiri məlumat verib.

“Mən Minsk Qrupunun həmsədrləri qismində Ermənistan və Azərbaycan arasında möhkəm sülhə nail olunmasına yardımla bağlı birgə addımlarımız haqqında danışdım”, deyə nazir Jan-İv Le Drian Dövlət Departamentində və Ağ Evdə keçirdiyi görüşlərin yekunlarına dair bəyanatında bildirib.

Bu addım dövlət katibi Entoni Blinkenin Ermənistanın baş naziri səlahiyyətlərini icra edən Nikol Paşinyanla telefon söhbətindən cəmi bir gün sonra atılıb. O, telefon söhbəti zamanı “ABŞ-ın Minsk Qrupu həmsədrlərinin Dağlıq Qarabağ münaqişəsinin möhkəm siyasi nizamlanmasına yönəlmiş səylərini dəstəklədiyini vurğulayıb”, deyə Dövlət Departamentinin məlumatında qeyd edilir.

Blinken “Ermənistanı ATƏT-də konstruktiv əməkdaşlığa çağırıb və bütün saxlanılan ermənilərin tezliklə Azərbaycandan Ermənistana qayıtmasına dəstəyini təsdiq edib”, deyə ABŞ-ın xarici siyasət idarəsinin Yerevana telefon zəngi ilə bağlı məlumatında bildirilir.

Amerika və Fransanın yüksək vəzifəli diplomatları möhkəm ikitərəfli əlaqələri təsdiq ediblər və bir sıra ortaq xarici siyasi maraqlar, o cümlədən Rusiya, İran və Çinlə bağlı fikir mübadiləsi aparıblar.

Le Drianın qeyd etdiyinə görə, bu kontekstdə Vaşinqton və Paris “Rusiya ilə növbəti addımları hazırlamaq üçün silahlara və strateji sabitliyə nəzarət məsələləri ilə bağlı sıx koordinasiyanı, o cümlədən NATO çərçivəsində koordinasiyanı dəstəkləmək” barədə razılığa gəliblər.

“Mən eyni zamanda Fransanın Ukrayna böhranının Normand formatı çərçivəsində həlli və Belarusda inklüziv dialoqun təşviqi ilə bağlı israrlı səylərini xatırlatdım”, deyə Le Drian əlavə edib. -0-