Azərbaycanlılar Zəngəzura qayıdacaqlar – İlham Əliyev

Bakı/15.07.21/Turan: Azərbaycanlılar Zəngəzura dədə-baba torpaqlarına qayıdacaqlar, bu barədə çərşənbə günü prezident İlham Əliyev bildirib. O qeyd edib ki, Azərbaycanın Ermənistana qarşı ərazi iddiası yoxdur, söhbət 10 noyabr 2020-ci il tarixli üçtərəfli bəyanatda (Azərbaycan, Ermənistan və RF liderlərinin) nəzərdə tutulduğu kimi, qaçqınların qayıtmasından gedir.

Əliyev Ermənistanda Azərbaycan prezidentinin fərmanı ilə Şərqi Zəngəzur iqtisadi zonasının yaradılmasına isterik reaksiyanı əsassız adlandırıb.

"İndi Ermənistanda bu məsələ ilə bağlı isterikaya qapılırlar. Buna ehtiyac yoxdur, Şərqi Zəngəzur bizim tarixi torpağımızdır, Qərbi Zəngəzur bizim tarixi torpağımızdır. Biz tarixi unuda bilmərik, kiminsə siyasi maraqlarının girovuna çevirə bilmərik. Gəlsinlər, açsınlar tarixi sənədləri, xəritələri, baxsınlar, sovet hökuməti Zəngəzuru nə vaxt Azərbaycandan qoparıb Ermənistana verib", deyə Əliyev Bakının Binəqədi rayonunun Xocasən qəsəbəsində şəhid ailələrinə və müharibə əlillərinə mənzil və avtomobillərin təqdim edilməsi mərasimində bildirib.

O qeyd edib ki, söhbət yaxın keçmişdə, 101 il əvvəl baş vermiş hadisələrdən gedir.

"Yəni, biz deyək ki, bu, olmayıb? Nəyə görə? Biz həqiqəti deyirik. Bizim dədə-baba torpağımızdır: bütün Zəngəzur - Şərqi və Qərbi Zəngəzur. İndi Ermənistanda deyirlər ki, İlham Əliyev ərazi iddiası ilə çıxış edir. Əgər Şərqi Zəngəzur varsa, deməli, Qərbi Zəngəzur da var. Bəli, Qərbi Zəngəzur bizim dədə-baba torpağımızdır. Demişəm ki, biz oraya qayıtmalıyıq. Bunu hələ on il bundan əvvəl demişəm. Mənim çıxışlarım hamısı mətbuatda var. Demişəm ki, bizim dədə-baba torpağımızdır, biz oraya qayıtmalıyıq və qayıdacağıq və qayıdırıq. Heç kim bizi dayandıra bilməz. Mütləq qayıdacağıq, çünki bunun başqa yolu yoxdur", deyə Əliyev bildirib.

"İndi bütün kommunikasiyalar açılandan sonra, əlbəttə, biz qayıdacağıq və Azərbaycan əhalisi öz dədə-baba torpaqlarına qayıdacaq. Üçtərəfli 10 noyabr Bəyanatında göstərilir: Bütün qaçqınlar öz doğma torpaqlarına qayıtmalıdırlar. Bizim doğma torpağımız Zəngəzurdur, bizim doğma torpağımız Göyçə mahalıdır, İrəvandır. Biz qayıdacağıq, əlbəttə", deyə Əliyev vurğulayıb. -06D-