Aİ komissarı Günter Ettinger Bakıdadır

Bakı/20.02.19/Turan: Avropa İttifaqının büdcə məsələləri və insan resurslarına məsul komissarı Günter Ettinger fevralın 20-də Bakıya birgünlük səfərə gəlib. O, "Cənub" qaz dəhlizi üzrə nazirlərin görüşündə iştirak edəcək.

Səfər çərçivəsində G.Ettinger "Cənub" qaz dəhlizi haqqında birgə bəyannaməni imzalayıb və Azərbaycanın energetika naziri Pərviz Şahbazovla birlikdə mətbuat üçün bəyanatla çıxış edib. Bu barədə Aİ-nin Azərbaycandakı missiyasının məlumatında bildirilir.

Komissar Ettinger "Cənub" qaz dəhlizi Konsultativ Şurasının beşinci nazirlər müşavirəsinin birgə bəyannaməsinin imzalanmasını Avropada enerji mənbələrinin və marşrutlarının gələcək diversifikasiyası üçün mühüm addım kimi alqışlayıb. "Tərəfdaşlar yeni infrastrukturdan ən yaxşı şəkildə istifadə etməli və onun gücünü mümkün qədər iki dəfə artırmalıdır", - o deyib.

G.Ettingerin prezident İlham Əliyev, BP-nin regional prezidenti, Türkiyə və Bolqarıstanın energetika nazirləri ilə görüşləri gözlənilir. 02D-