Aİ-nin dəstəyi ilə Azərbaycan fermerləri üçün portal yaradılıb

Bakı/07.12.22/Turan: Avropa İttifaqı, Azərbaycanın Kənd Təsərrüfatı Nazirliyi və İqtisadiyyat Nazirliyi fermerlər üçün çoxfunksiyalı informasiya-analitik portalın yaradılması üzərində iki illik işi yekunlaşdırıblar.

Kənd Yerlərində Biznes İnformasiya Sistemi portalı RBIS.az ilkin kompüter savadlılığı biliklərinə malik kənd təsərrüfatı fermeri üçün nəzərdə tutulub.

Portalda kənd təsərrüfatı məhsullarının növləri, kənd təsərrüfatı heyvanları, məhsuldarlıq, Azərbaycanda hər hektara görə torpağın keyfiyyəti haqqında məlumatlar və bitkilər və ət-süd məhsulları ilə bağlı məhsuldarlıq proqnozları yer alır.

Portalda həmçinin elmi məqalələr, kənd təsərrüfatı bitkilərinin və heyvanların yetişdirilməsi təcrübəsi haqqında nəşrlərdən ibarət kitabxana var, kənd təsərrüfatı sığortası, investisiyalar, bazar və s. ilə bağlı məsləhət almaq, həmçinin onlara çıxış əldə etmək imkanı var.

Yeni resursda Quba və Xaçmazda 4 min fermerdən əldə olunmuş məlumatlaran istifadə olunub. Portalın yaradılması Avropa İttifaqı tərəfindən maliyyələşdirilib, işi Azərbaycan mütəxəssisləri KYBIS rəhbəri Henri Yorgensenin rəhbərliyi altında həyata keçiriblər.

Dekabrın 6-da portalın təqdimatında Henri Yorgensen deyib ki, hazırda portalın pilot, demo versiyası Qubada alma və Xaçmazda pomidor yetişdirilməsi üzrə fermer təsərrüfatlarından əldə edilən məlumat əsasında qurulub. 

Gələcəkdə Kənd Təsərrüfatı Nazirliyinin Aqrar Tədqiqatlar Mərkəzinin kollektivi Aİ peyklərindən alınan pulsuz məlumatlardan, Azərbaycan Statistika Komitəsinin hesabatlarından, yerli fermerlərin məlumatlarından, açıq mənbələrdən və s. istifadə edərək məlumatlar bazasını genişləndirə bilər.

Aqrar Tədqiqatlar Mərkəzinin əməkdaşları portal üzərində işləmək üçün treninqlər keçiblər və Aİ-nin Avropadakı analoji resursları ilə tanış olublar, Azərbaycan fermerlərindən məlumatları yığıblar və Azərbaycan peyklərindən əldə olunan məlumatlardan istifadə ediblər, deyə Yorgensen bildirib.

Aqrar Tədqiqatlar Mərkəzinin direktoru Firdovsi Fikrətzadə deyib ki, yeni portal bir neçə informasiya partalında (Agrodata, Agroinvest və s.) yarım milyondan çox fermerin məlumatlarına malik olan Kənd Təsərrüfatı Nazirliyinin informasiya şəbəkəsini tamamlayıb.

Fermerlər onlayn qaydada məsləhət, bazarlar haqqında məlumat əldə edə, bazarlarda məhsul, biznesin inkişafına dair audio və mətn məlumatları yerləşdirə biləcəklər.

Kənd Təsərrüfatı Nazirliyinin informasiya bazası Elektron Hökumət dövlət proqramı çərçivəsində yaradılıb və genişləndirilir.

İqtisadiyyat Nazirliyinin Sahibkarlığın inkişafı siyasəti və tənzimlənməsi şöbəsinin müdiri Elçin İbrahimovun sözlərinə görə, ölkədə elektron, onlayn inzibatçılıq uğurla inkişaf edir. 2015-ci ildən 2022-ci ilə qədər lisenziyalaşdırılan fəaliyyət növlərinin sayı 56-dan 36-ya qədər azalıb, onlayn qaydada 1500 lisenziya verilib. İqtisadiyyat Nazirliyinin məqsədi bütün lisenziyaları onlayn formatda verməkdir.

RBIS.az portalının təqdimatının sonunda Yorgensen Azərbaycan idarələrinə kənd təsərrüfatı sahəsindən kənara çıxaraq portalı ölkədəki digər data-resurslarla inteqrasiya etdirməyə və təhlil və proqnozlaşdırma üçün indikatorlar siyahısını genişləndirməyə, portalın daim yenilənən, tədqiqatçılar və tələblər üçün açıq olmasını təmin etməyə çağırıb. 

Gələcəkdə portalın işinin maliyyələşdirilməsi məsələsi açıq olaraq qalır. Yorgensen portalın Aİ və Azərbaycan Kənd Təsərrüfatı Nazirliyi tərəfindən maliyyələşdiriləcəyinə ümid etdiyini bildirib. 0