Aİ Telişli kəndində ekomiqrant icması üzrə layihənin yekunlarını təqdim edib

Bakı/29.01.21/Turan: Avropa İttifaqının Azərbaycandakı nümayəndəliyi "Telişli ekomiqrant icmasında gəlir mənbələrinin formalaşdırılması üçün kənd təsərrüfatı üzrə təşəbbüslər" layihəsinin təqdimatını təşkil edib.

Qeyd edək ki, icma 2010-cu ildə İmişli-Kürdəmir zonasında Kür çayının daşması nəticəsində formalaşıb. İcma üzvləri Telişli və Allahməmmədli kəndlərinin sakinləridir.

Tədbirdə çıxış edən Aİ-nin Azərbaycandakı nümayəndəliyinin rəhbəri Kəstutis Yankauskas qeyd edib ki, layihə böyük uğurla başa çatıb və layihənin nəticələrinin davamlı olacağını gözləyir.

"Bu layihə Aİ-nin Azərbaycanda kənd yerlərinin inkişafı ilə bağlı səkkiz layihəsindən biridir. Bizim layihələr Azərbaycanın 30 rayonunda 5 mindən artıq adamı əhatə edir. Layihələrə bir çox ailə təsərrüfatı daxildir. Layihələr bir daha göstərdi ki, vətəndaş cəmiyyəti onlara qoşulduqda böyük uğur qazanırlar", - diplomat deyib.

Layihə "Ruzqar" ictimai ekoloji təşkilatı tərəfindən həyata keçirilib. Onun yekunlarını təqdim edən QHT rəhbəri İslam Mustafayev bildirib ki, layihədə beş bənd olub:

1) Otlaqların məhsuldarlığının artırılması və suvarma sisteminin təkmilləşdirilməsi;

2) Xalçaçılıq sexinin yaradılması;

3) İcmada istehsal olunan məhsulların satışı üzrə yolkənarı kooperativ xidmətin təşkili;

4) "Hələb" keçisinin yetişdirilməsi»;

5) Balıq yetişdirilməsi üçün gölün bərpası.

İ.Mustafayev bildirib ki, bu iki kəndin sakinləri 2010-cu ildə baş vermiş daşqınlar nəticəsində ekoloji və sosial problemlərlə üzləşiblər. Hazırda icma 276 ailədə 1250 nəfəri əhatə edir.

“Hökumət bu ekomiqrantlar üçün yeni qəsəbə tikib. Cəmi 104 ev tikilib. Daşqınlar nəticəsində sakinlərin gəlirləri kəskin şəkildə azalıb. Lakin layihənin həyata keçirilməsi icma üzvləri üçün iş yerləri yaradıb və gələcək gəlir mənbələrinin təməlini qoyub", - o bildirib.

Mustafayev hesab edir ki, bu layihənin reallaşması zamanı əldə edilmiş təcrübədən Qarabağda azad edilmiş ərazilərin bərpası zamanı tam istifadə etmək olar. –71D-