Mövlud Çavuşoğlu: “Biz Yerevandan konstruktiv addımlar gözləyirik”

Bakı/29.01.21/Turan: “Cənubi Qafqazda sülh regionun bütün ölkələrinin, xüsusilə də Ermənistanın maraqlarına cavab verir. Ona görə də biz Yerevandan bu istiqamətdə konstruktiv addımlar gözləyirik". “Anadolu” agentliyinin məlumatına görə, bu barədə  Türkiyənin xarici işlər naziri Mövlud Çavuşoğlu cümə günü İstanbulda iranlı həmkarı Məhəmməd Cavad Zərif ilə görüşündə bildirib.

M.Çavuşoğlunun sözlərinə görə, o, Zəriflə regionda, o cümlədən Suriya və Cənubi Qafqazda vəziyyəti müzakirə edib.

Daha sonra Türkiyə diplomatiyasının rəhbəri diqqəti ABŞ-ın antiiran sanksiyaları mövzusuna yönəldib, qeyd edib ki, Ankara lap əvvəldən İrana qarşı məhdudiyyətlərə qarşı çıxıb. "Ümid edirəm ki, Co Bayden Administrasiyası İranla nüvə söcdələşməsinin şərtlərinə qayıdacaq. Bununla da qardaş İrana qarşı sanksiyalar aradan qaldırılacaq", - Çavuşoğlu deyib.

Öz növbəsində İran XİN rəhbəri qeyd edib ki, İran və Türkiyənin Qafqazda əməkdaşlığı birmənalı olaraq regiona fayda gətirəcək.—16D06-