Almazbəy Atambayev güc qurumlarına təslim olub

Bakı/08.08.19/Turan: Qırğızıstanın keçmiş prezidenti Almazbəy Atambayev güc qurumlarına təslim olub, onu Koy-Taş kəndindəki iqamətgahından çıxarıblar. Bu barədə avqustun 8-də "24.Kg" və "Fərganə" nəşri bildirib.

A.Atambəyovla birlikdə maşında onun tərəfdarları Kunduz Joldubayev və Fərid Niyazov olub. Təslim olmaq barədə qərar danışıqların yekunlarına əsasən qəbul edilib.

Danışıqlardan öncə iki gün ərzində üç dəfə xüsusi təyinatlı tərəfindən A.Atambayevin iqamətgahına hücum olub.

Bununla belə, iqamətgah ətrafında eks-prezidentin tərəfdarları ilə güc qurumları əməkdaşları arasında toqquşmalar davam edir. Hələlik zərərçəkənlər barədə məlumat verilmir. Güc qurumları tərəfindən iki nəfərin öldüyü məlumdur. Ötən gün girov götürülmüş altı xüsusi təyinatlının taleyi məlum deyil. Avqustun 7-də toqquşmadan sonra yaralananların sayı 70 nəfəri ötüb.

Ölkə hakimiyyəti A.Atambayevə qarşı bir sıra maddələrlə cinayət işi qaldırıb. Bunların arasında xüsusilə ağır cinayətlər (qətl, hakimiyyət nümayəndələrinə qarşı zorakılıq tətbiq etmək, kütləvi iğtişaşların təşkili) var.-02D-