Amnesty İnternational azərbaycanlı müxalifətçini müdafiə kampaniyasına başlayıb

Bakı/19.06.20/Turan: Amnesty İnternational hüquq- müdafiə təşkilatı Bakıda psixiatriya xəstəxanasına yerləşdirilmiş müxalifətçi Aqil Hümbətovu müdafiə kampaniyasına başlayıb.

Bəyanatda qeyd olunub ki, hakimiyyəti tənqidinə görə xəstəxanaya məcburi qaydada yerləşdirildikdən sonra ona naməlum narkotik maddələr vurublar.

Bununla əlaqədar, təşkilat psixiatriya xəstəxanasının baş həkimi Ağahəsən Rəsulova və Azərbaycanın ABŞ-dakı səfiri Elin Süleymanova etiraz məktubları yazmağa çağırıb.

Təşkilatın saytında yerləşdirilmiş müraciətin mətnində Xalq Cəbhəsi Partiyasının üzvü A.Hümbətovun hakimiyyəti tənqid etdiyinə görə məcburi müalicəsindən narahatlıq ifadə olunur.

Bu il aprelin 1-də Sabunçu məhkəməsi məcburi xəstəxanaya yerləşdirilmə ilə bağlı xəstəxananın vəsatətini təmin etməyib və onun azad edilməsinə qərar verib. Lakin A.Hümbətov sosial şəbəkələrdə müraciət yayaraq zorla xəstəxanaya yerləşdirildiyini bildirdikdən sonra aprelin 2-də polis onu yenidən həbs edib və xəstəxanaya aparıb.

Aprelin 3-də Bakı Apellyasiya Məhkəməsi əvvəlki qərarı ləğv edib və xəstəxananın baş həkiminin tövsiyəsi ilə məcburi xəstəxanaya yerləşdirilməni təqdir edib.

O vaxtdan xəstəxana administrasiyası A.Hümbətovun ailəsinə onunla görüşə imkan vermir. Mayın 12-də o, telefonla həyat yoldaşına şikayət edib ki, həkimlər onun iradəsinə zidd olaraq naməlum iynələr vururlar, buna görə də səhhəti pisləşib.

İyunun 2-də xəstəxana administrasiyası məcburi xəstəxanaya yerləşdirilmənin müddətini daha bir ay uzadıb. Bütün bunlar insan ləyaqətinin alçaldılması, qeyri-insani rəftar, sağlamlıq, ifadə azadlığı, şəxsi azadlıq hüququnun pozulması ilə bağlı görünməmiş haldır.

Petisiyada A.Hümbətovun məcburi müalicəsinin dərhal dayandırılmasına və onun dərhal psixiatriya xəstəxanasından çıxarılmasına çağırılır.—06D-