Amnesty International  “Meydan” TV-nin həbs olunmuş jurnalistlərinin müdafiə kampaniyasına başlayıb

Amnesty International beynəlxalq hüquq- müdafiə təşkilatı Azərbaycanda həbs olunmuş yeddi jurnalistin və media işçisinin azad edilməsi tələbilə kampaniyaya başlayıb.

"Onların qanunsuz saxlanması və həbs edilməsi  bir il əvvəl jurnalistlərə və hökumətin tənqidçilərinə qarşı artan repressiyaların bir hissəsi oldu", - təşkilatın bəyanatında deyilir.

Amnesty International jurnalistlərin dərhal azad edilməsi çağırışı ilə prezident İlham əliyevə məktub göndərilməsinə təşəbbüs göstərib.

"6 dekabr 2024-cü ildə hüquq-mühafizə orqanları “Meydan” TV-nin əməkdaşlarını – Xəyalə Ağayeva, Aytac əhmədova, Aynur Qənbərova, Natiq Cavadlı, Aysel Umudova və Ramin Deko (Cəbrayılzadə), həmçinin Bakı Jurnalistika Məktəbinin direktor müavini Ülvi Tahirovu həbs ediblər.

Onlar ölkəyə valyuta qaçaqmalçılığında ittiham olunublar. Azərbaycanda digər tənqidi səslərə qarşı istifadə olunan ittihamlara bənzər bu ittiham uydurma və siyasi motivlidir", - məlumatda deyilir.

Beynəlxalq kampaniya mart ayına qədər davam edəcək.

Qeyd edək ki, bundan əvvəl Azərbaycanda analoji ittihamla “Abzas Media”, “Kanal 13”, “Toplum” TV və digər nəşrlərin 15-ə yaxın jurnalisti və media işçisi həbs edilib.