Arif Hacılının oğlu Cinayət Məcəlləsinin iki maddəsilə ittiham olunur

Bakı/01.11.23/Turan: Müsavat Partiyasının rəhbəri Arif Hacılının oğlu Orxan Hacılıya qarşı Azərbaycan Cinayət Məcəlləsinin iki maddəsilə cinayət işi açılıb. Bu barədə Turan-a partiyanın mətbuat xidmətinin rəhbəri Mustafa Hacıbəyli məlumat verib.

Orxan Hacılı Azərbaycan Cinayət Məcəlləsinin 263.1-ci (yol hərəkəti qaydalarının pozulması, səhlənkarlıqla sağlamlığa daha az ağır zərər vurmaqla) və 264-cü (yol-nəqliyyat hadisəsi yerinin tərk edilməsi) maddələrində nəzərdə tutulmuş əməllərdə ittiham olunur.

"Bu, tamamilə siyasi prosesdir. Qəzanı başqa adam törədib. Əslində zərərçəmiş Orxanın özüdür, çünki  xəsarət alıb. Hakimiyyət Arif Hacılıya və Müsavat Partiyasına təzyiq göstərmək üçün işi saxtalaşdırır", - Hacıbəyli deyib.

Turan-a məlum ki, bu gün məhkəmə Orxan Hacılının barəsində həbs qətimkan tədbiri seçəcək.

Hacılıı Cinayət Məcəlləsinin həmin maddələrinin hər biri üzrə 2 ilə qədər həbs cəzası gözləyir.

Daxili İşlər Nazirliyindən şərh almaq mümkün olmayıb.

Oktyabrın 31-də Hacılı oktyabrın 11-də baş vermiş avtomobil qəzasına görə şübhəli şəxs qismində saxlanılıb. Oktyabrın 20-də sosial şəbəkələrdə yayılan videoda qəzanı Müsavat Partiyası rəhbərinin oğlunun törətdiyi barədə məlumat "sızıb".

25 saniyəlik videoda görünür ki, tünd rəngli avtomobil yol hərəkəti qaydalarını pozan ağ rəngli avtomobillə toqquşur. Nəticədə tünd avtomobil park edilmiş avtomobilə çırpılır.

https://www.facebook.com/photo/?fbid=7401279946567198&set=a.721222927906300.  21В