Arlem Dezir Azərbaycan hakimiyyətini jurnalistlərin təqibinə son qoymağa çağırıb

Bakı/19.12.17/Turan: ATƏT-in KİV azadlığı üzrə nümayəndəsi Arlem Dezir Kanal-13 internet televiziyasının direktoru Əziz Orucov haqqında hökmlə bağlı ciddi narahatlığını bildirib.

Dezirin bəyanatında xatırladılır ki, dekabrın 15-də Bakı Ağır Cinayətlər Məhkəməsi Orucovu qanunsuz sahibkarlıq və vəzifə səlahiyyətlərindən sui-istifadə ittihamı ilə altı il azadlıqdan məhrumetmə cəzasına məhkum edib.

"Hakimiyyəti Azər Orucov barəsində hökmə yenidən baxmağa və onun azadlığına və təhlükəsizliyinə zərbə vuran məhdudlaşdırıcı tədbirlərə son qoymağa çağırıram", deyə Dezir bildirib.

O, Orucov barəsində hökmün Apellyasiya Məhkəməsi tərəfindən ləğv ediləcəyinə ümidini ifadə edib.

Dezir hələ Azərbaycan hökumətinə 30 noyabr tarixli məktubunda ittiham tərəfin Orucovun təqsirinin heç bir dəlilini təqdim etmədiyini qeyd edib.

Dezir həmçinin jurnalistin müstəqil mövqeyi ilə tanınan Kanal-13-də fəaliyyətinə görə təqibə məruz qaldığı haqqında məlumatlara istinad edib.

Dezir 2017-ci il mayın sonlarında Tbilisidə oğurlandığı bildirilən jurnalist Əfqan Muxtarlıya qarşı davam edən məhkəmə təhqiqatı ilə bağlı narahatlığını da bildirib.

"Muxtarlının oğurlandığı və uydurma ittihamlarla həbs edildiyi haqqında məlumatların ciddiliyinə baxmayaraq, onun hələ də həbsdə saxlanılması narahatlıq doğurur", deyə Dezir bildirib. "Hakimiyyəti israrla jurnalistə qarşı bütün ittihamlardan imtina etməyə və onun ifadə azadlığı hüququna hörmət etməyə çağırıram", deyə Dezir əlavə edib.

ATƏT nümayəndəsi həmçinin qeyd edib ki, bu yaxınlarda məşhur araşdırmaçı jurnalist Xədicə İsmayılovanın bank hesabları dondurulub.

Bundan başqa, Dezir Bakı Apellyasiya Məhkəməsinin Reportyorların Azadlıq və Təhlükəsizlik İnstitutunun sədri Mehman Hüseynov barəsində hökmün qüvvədə qalması haqqında qərarından məyusluğunu ifadə edib. -06D-