Atəşkəs Ermənistan işğal edilmiş əraziləri azad etdiyi təqdirdə mümkündür – İ.Əliyev

Bakı/26.10.20/Turan: Azərbaycan bu gün elan edilmiş humanitar atəşkəsə riayət edir. Amma Ermənistan işğal edilmiş ərazilərdən qoşunlarını çıxarmağa hazır olduğunu bəyan etməsə və ATƏT MQ-nin təməl həll prinsiplərində nəzərdə tutulduğu kimi qoşunlarının çıxarılması qrafikini təqdim etməsə, Azərbaycan öz torpaqlarını azad etməyə davam edəcək. Azərbaycan prezidenti İlham Əliyevin bugünki telemüraciətində verdiyi əsas mesaj bundan ibarət idi.

Azərbaycan 30 ilə yaxın davam edən səmərəsiz danışıqları davam etdirmək niyyətində deyil. Azərbaycan heç bir təzyiqi qəbul etməyəcək.

30 ilə yaxındır Minsk Qrupunun həmsədrləri Azərbaycanı münaqişənin dondurulması prosesi ilə barışdırmağa çalışıblar. Amma biz yeni reallıq yaratmışıq, indi qoy hamı bu reallıqla barışsın.

Biz öz torpaqlarımızı azad etməyə başlayan kimi bizə hərbi əməliyyatları dayandırmaq üçün təzyiq göstərməyə başladılar. Biz bu danışıqlardan boğaza yığılmışıq. Nə qədər danışıqlar olar?

Atəşkəs istəyirsinizsə erməniləri işğal edilmiş ərazilərdən çıxmağa məcbur edin, deyə Əliyev bildirib.

Onun sözlərinə görə, beynəlxalq vasitəçilər Ermənistana təzyiq göstərmirdilər, əksinə, BMT TŞ-nin qətnamələrinə baxmayaraq, onun işğalçı siyasətinə göz yumurdular. İndi Azərbaycan özü təkbaşına BMT TŞ-nin qətnamələrini yerinə yetirir.

İndi Minsk Qrupunun bütün səyləri Ermənistanın – təcavüzkarın, işğalçının, Xocalı soyqrımını törədən, Gəncənin dinc əhalisinə atəş açan ölkənin xilas edilməsinə yönəlib, deyə Azərbaycan prezidenti bildirib.

ABŞ-dakı danışıqlardan sonra Cenevrədə Azərbaycan və Ermənistan XİN başçılarının görüşünün keçirilməsi barədə qərar qəbul edilib. Mənim etirazım yoxdur, qoy görüşsünlər. Bu 28 il ərzində o qədər mənasız görüşlər olub ki, biri artıq, biri əksik. Amma biz istəyirik ki, onun mənası olsun, bu danışıqlar münaqişənin həllini sürətləndirməlidir, deyə Əliyev bildirib.

Ermənistanın havadarları, mən onlara üz tuturam. Bu qondarma ölkəni xilas etmək istəyirsinizsə, deyin, bizim torpaqlarımızdan rədd olsunlar. Sizin bir sözünüz kifayətdir ki, onlar getsinlər, deyə Əliyev qeyd edib.

Bunun əvəzinə biz müntəzəm olaraq Ermənistana silah göndərildiyini görürük. Sülhü bərqərar etmək istəyən vasitəçilər özlərini belə aparmamalıdırlar, deyə Əliyev qeyd edib. O, həmçinin bildirib ki, hələlik bütün təfsilatını açıqlamır, amma vaxt gələcək, o, Ermənistana qanunsuz silah göndərənlərin adlarını açıqlayacaq. -06D-