ATƏT MQ-nin həmsədrlərinin Azərbaycan və Ermənistan XİN başçılarının görüşü haqqında bəyanatı

Bakı/30.06.20/Turan: ATƏT-in Minsk Qrupunun həmsədrləri İqor Popov (Rusiya Federasiyası), Stefan Viskonti (Fransa) və Endryu Şafer (ABŞ) iyunun 29-30-da Azərbaycan və Ermənistan XİN başçıları - Elmar Məmmədyarov və Zohrab Mnatsakanyanla videokonfrans formatında ayrı-ayrılıqda və birgə görüş keçiriblər. Bu barədə həmsədrlərin iyunun 30-da yaydıqları bəyanatda deyilir. 

Görüşlərdə regionda ictimai səhiyyə sahəsində vəziyyət, Dağlıq Qarabağ münaqişəsinin hazırki dinamikası və sülh prosesində gələcək addımlar müzakirə olunub. ATƏT-in fəaliyyətdə olan sədrinin şəxsi nümayəndəsi Andjey Kasprşik də bu müzakirələrdə iştirak edib.

Həmsədrlər sülhə şərait yaradan və konkret danışıqlar üçün əlverişli mühitin yaradılmasının və qorunub saxlanmasının vacibliyini vurğulayıblar. Onlar yerlərdə nisbi sabitliyi müsbət qiymətləndiriblər və tərəflərin gərginlikdən uzaq olmaq üçün mövcud birbaşa əlaqə kanallarından istifadə etməyə davam etmələri ilə bağlı məmnuniyyətlərini dilə gətiriblər. Bununla belə, 9 mart 2019-cu il tarixli bəyanatlarına istinad edən həmsədrlər bu yaxınlarda səslənən təxribat xarakterli bəyanatlar, təhrikedici ritorika və yerlərdə vəziyyətin dəyişməsinə yönələn mümkün addımlar nizamlanma prosesini hiss olunacaq dərəcədə poza bilər.

Həmsədrlər qeyd ediblər ki, münaqişənin hərbi həll yolu mövcud deyil. Onlar israrla tərəfləri atəşkəs rejiminin möhkəmləndirilməsi və əhalinin sülhə hazırlanması üçün əlavə addımlar atmağa çağırıblar. Həmsədrlər həmçinin şərtlər imkan verdiyi anda təmas xəttində monitorinqin bərpası zərurətini vurğulayıblar. 

Həmsədrlər və xarici işlər nazirləri iyulda daha bir birgə videokonfrans keçirmək və mümkün qədər tez şəxsən görüşmək barədə razılıq əldə ediblər. -06D-