Media-icmal 01.07.20

Koronavirus pandemiyasına qarşı mübarizə, Neftçala rayonunun su problemi, komitə sədrindən hökumətə təklif,  Xəzər sahillərinin hələ də hasarlı qalması və s. məsələlər medianın aparıcı mövzuları sırasındadır.

Özünü qorumaq məsuliyyəti

“Azərbaycan” qəzeti” “Artırılan cərimələr məsuliyyətsizliyin nəticəsidir” sərlövhəli məqalədə ölkədə koronavirus pandemiyasına qarşı mübarizəni dəyərləndirir.  

Müəllif deyir ki, infeksiyanın yayıldığı ilkin mərhələdə məhdudiyyət və qadağalarla qarşısını almaq mümkün oldu, amma  sonrakı mərhələdə qadağaların yumşaldılması ilə virusa yoluxma artmağa başladı

Müəllifin fikrincə, bunun baş verməsinə səbəb insanların qaydalara əməl etməməsi olub, amma hesab edir ki, uzun sürən karantin rejimi özü də pandemiya qədər təhlükəli nəticələrə səbəb ola bilər.

Yazı müəllifinə görə, ölkə daxilində isə bütün imkanlar bu virusla mübarizəyə yönəlib, virusa yoluxan xəstələr xəstəxana şəraitində müalicə olunur, aztəminatlı ailələrə yardım, sahibkarlara dəstək verilir.

Müəllif deyir ki, bu virus hələ də yaşadığı üçün  sağlamlığını qorumaq həm də hər bir vətəndaşın məsuliyyətinə çevrilir və bunun üçün ictimai yerlərdə məsafə saxlanmalı, qapalı yerlərdə maskadan istifadə edilməli, şəxsi gigiyenaya həmişəkindən daha diqqətli yanaşılmalıdır.

Məqalə müəllifinin iddiasına görə, bir çox vətəndaşlar yumşaldılmanı koronavirusun dünyadan yox olması kimi anlayaraq, qoyulan qaydalara riayət etməyi bir kənara qoydular, yoluxma sayı artdığı üçün yenidən karantin rejiminin uzadılmasına qərar verildi.

Yazıda vurğulanır ki, bu qaydaların pozulmasına görə Milli Məclis bu il iyunun 29-da cərimələrin həcmini artırdı (maska taxmamağa görə fiziki şəxs 100 manat, vəzifəli şəxs 200 manat, hüquqi şəxs 400 manat cərimə edilir-red.).

Salyan və Neftçalada su problemi

Neftçala camaatı su deyıb haray çəkir. Bunu adı çəkilən rayondan deputat seçliən Sabir Rüstəmxanlı bildirib.

Problem budur ki, Kür çayının səviyyəsi aşağı enib, Salyan və Neftçala rayonlarında içməli su problemi yaranıb.  

Bu məsələ ilə bağlı artıq bir həftədən çoxdur ki, sosial şəbəkələrdə yazılır..

“Yayın quraq keçməsi, suvarma mövsümünün başlanması Kürün suyunu azaldıb. Yatağının bir tərəfinə çəkilib, dibinin çadar-çadar torpağı üzə çıxıb. Bir yandan da Kür deltasının yanlış istiqamətdə dərinləşdirilməsi və güclü xəzri Xəzərin suyunu tərsinə Kürə axıdıb, şor su çay yuxarı qalxıb 20-30 km.-lik məsafədə çayın suyunu tam yararsız vəziyyətə salıb. Neçə müddətdir Neftçala camaatı su deyıb haray çəkir. Rayon rəhbərliyinin və millət vəkili kimi mənim dincliyimiz yoxdur”, -deputat bildirib. 

Deputat deyir ki, maşınlarla yalnız evlərə içməli su daşına bilir, heyvan-qara, əkin sahələri bu yolla suvarıla bilməz.

Deputata görə, son günlərdə Kür boyu bəzi nasosların dayandırılması nəticəsində Kür yenə yüksəlir, amma bu mövsümdə nasosları uzun müddət dayandırmaq olmaz.

Bu gərginlik Neftçala şəhərinin içməli su problemini də gündəmə gətirdi. “Azərsu” bildirir ki, Neftçalaya içməli su kəmərinin çəkilişi sürətlənib, bu iş iki ay ərzində tamamlanacaq.

Cəriməni, yoxsa nəzarəti artırmaq...

Operativ Qərargah təcili alternativ yollar düşünməlidir,  Bu təklifi “Modern.az”a  açıqlamasında Milli Məclisin Sosial siyasət komitəsinin sədri Musa Quliyev səsləndirib.

Deputat deyir ki, koronavirusla mübarizədə cərimələri artırmaqla nəyəsə nail olunmayacaq (Milli Məclisin iyunun 29-da karantin qaydalarının pozulması ilə bağlı cərimələrin artırılması barədə qərarı nəzərdə tutulur-red.). Bundan irəli gələrək  komitə sədri supermarketlərdə, apteklərdə və ictimai nəqliyyatda (metro və avtobus) nəzarət tədbirlərinin gücləndirilməsini təklif edir.

Komitə sədrinə görə, qaydalara nəzarəti gücləndirməsə cərimə 10 qat artırsaq da nəticə olmayacaq; “Hər yoluxma artdıqca cəriməni qaldırmaqla bir nəticə əldə edə bilməyəcəyik. Operativ Qərargah alternativ yollar düşünməli və bunu ictimaiyyətə təlqin etməlidir. Yoxsa 2-3 aydır eyni şeyləri deyirik, eyni şeyləri eşidirik”.

Deputata görə, ölkədə fəaliyyət göstərən market şəbəkələrinin rəhbərliyilə müzakirələr aparmalı, maskasız şəxslərin supermarketlərə daxil olmasına icazə verilməməlidir, çünki bunlar koronavirusun yayılma ocaqlarıdır”.

Deputata görə, karantin qaydalarına əməl olunması məqsədilə apteklərə və ictimai nəqliyyata da nəzarət güclndirilməlidir.

Daş hasarlardan o yana işləməyən qanunlar

“Hasara alınmış Xəzər – dənizi necə xilas etməli?”, Bu sualı isə “Müsavat.com” irəli sürür.

Müəllif deyir ki, Abşeron yarımadasının Xəzərsahili əraziləri başdan-başa hasarlanıb, mətbuat uzun illərdir ki, bundan yazır, parlamentdə bu barədə danışılır, amma, hələ ki bundan fayda yoxdur:  “Hər yay Xəzərsahili ərazilərin daş hasarlardan təmizlənməsi məsələsi gündəmə gəlir, haray-qışqırıq ərşə çıxır, hasarları isə sökən tapılmır. Sanki Azərbaycan qanunları Xəzər sahilində başdan-başa çəkilən hasarlara qədər qüvvədədir. Hasar başladısa, qanunlar qüvvəsini itirir”.

Müəllifə görə, kimlərsə, xalqın üzünə hasar çəkərək 2-3 kilometrlik ərazini mal-mülklərnə qatıblar. Vaxt var idi şəhərin maşın səslərindən, hay-küyüyndən bezənlər Xəzərə tamaşa etməklə sakitləşirdilər, indi isə artıq Xəzər sahilinə gələn yoxdur, çünki “sahil” yoxdur.

Müəllif hesab edir ki, Xəzər sahili bahalı əyləncəyə dönüb: “Dəniz sahili boyunca uzanan hasarları cəmiyyətdəki anormal təbəqələşmənin simvolu da hesab etmək olar...Görünən odur ki, rəsmilər hasar sahibləri ilə yola gedir, qanunlar isə hasarlara çatanda şah ola bilmir”.

Müəllif xatırladır ki, Azərbaycanda Xəzərlə bağlı qanunlar çoxdur, hər il də artır, amma oliqarxlara anlatmaq olmur ki, dəniz sahili bütün vətəndaşlara aiddir.