ATƏT ölkələri səfirlərinin Bakıya səfəri

Bakı/22.06.18/Turan: İyunun 21-22-də ATƏT ölkələrinin daimi təmsilçilərindən ibarət nümayəndə heyəti Bakıda bir sıra görüşlər keçirib.

Ötən gün səfirlər vətəndaş cəmiyyəti və müxalifət nümayəndələri ilə görüşüblər. Görüşün mövzusu insan hüquqları və demokratiya olub. Siyasi məhbuslar, rejim əleyhdarlarının təqib olunması, fundamental insan hüquqlarının pozulması səfirlərin diqqətinə çatdırılıb.

Bu gün səfirlər Milli Məclisdə və Nazirlər Kabinetində görüş keçiriblər. Parlamentin vitse-spikeri Bahar Muradova deyib ki, Azərbaycan heç bir bloka daxil deyil və həm ATƏT üzvü olan ölkələr, həm də bu quruma daxil olmayan ölkələr ilə münasibətlər qurur. O, fürsəti qaçırmayaraq "Avropanın növbəti ciddi böhran yaşadığını" da deyib.

Görüşdə iştirak edən parlament üzvləri Azərbaycanla ATƏT üzvləri və ümumilikdə Avropa ilə əməkdaşlığın vacibliyini qeyd ediblər.

Baş nazir Novruz Məmmədov səfirlər ilə görüşündə Azərbaycanın Avropanın enerji təhlükəsizliyinin təmin olunmasındakı mühüm rolunu qeyd edib.

Azərbaycanın Avropa və Asiyanı birləşdirən nəqliyyat qovşağı kimi rolu da vurğulanıb.

Qarabağ münaqişəsinə toxunan N.Məmmədov problemin ədalətli həlli istiqamətində ATƏT-in Minsk Qrupunun səylərinin gücləndirilməsinin vacibliyini vurğulayıb.-02D-