Avropa İttifaqı nümayəndəliyi gənclər üçün Avropa məktəbini təşkil edir

Bakı /12.06.23/Turan: 8-10 avqust 2023-ci il tarixində Avropa İttifaqının Azərbaycandakı nümayəndəliyi Azərbaycan regionlarının birində Avropa Məktəbini (EuroSchool) keçirəcək. Ümumilikdə, Avropa İttifaqının Azərbaycandakı nümayəndəliyi və Avropa İttifaqının “EU NEIGHBOURS east” kommunikasiya layihəsinin dəstəklədiyi EuroSchool-da iştirak etmək üçün ölkənin hər yerindən 18-25 yaş arası 18 gənc seçiləcək.

Beynəlxalq təlimçilərin iştirakı ilə 3 gün davam edəcək tədbirdə Avropa İttifaqı, onun tarixi, fundamental prinsip və dəyərləri, enerji və ətraf mühitlə bağlı məsələlər, Avropa Qonşuluq Siyasəti, Şərq Tərəfdaşlığı Təşəbbüsü və Avropa İttifaqı-Azərbaycan münasibətləri haqqında daha çox məlumat əldə etmək üçün bir sıra interaktiv sessiyalar keçiriləcək. İştirakcılar həmçinin Avropada gənclər üçün mövcud olan təhsil və digər imkanlar haqqında da eşidəcəklər. Proqramın təhsil hissəsilə yanaşı, iştirakçılar bölgə daxilində ekskursiyalarda iştirak edəcəklər. Avropa İttifaqı ölkələrindən olan gənclər də tədbirə qatılıb öz bilik və təcrübələrini Azərbaycan gənclərilə bölüşəcəklər.

Tədbirlə bağlı Bakıdan bölgəyə və geriyə nəqliyyat, yemək və yaşayış xərcləri Avropa nümayəndəliyi tərəfindən qarşılanacaq.

İştirakçılar 29 iyun 2023-ci il tarixinədək Delegation-Azerbaijan@eeas.europa.eu ünvanına göndəriləcək “Avropa İttifaqı-Azərbaycan – Güc Birlikdədir” mövzusunda kiçik esse daxil edən Motivasiya Məktubu və CV-lər əsasında seçiləcək. Proqram və seçim meyarları haqqında daha ətraflı məlumatı Avropa İttifaqı nümayəndəliyinin internet saytından https://www.eeas.europa.eu/delegations/azerbaijan əldə etmək olar.

Yay Məktəbi artıq 6-cı dəfədir ki, Azərbaycanda təşkil olunacaq. Məktəb 2016-cı ildə yaradılmış Avropa İttifaqının üzv dövlətlərini və Şərq Tərəfdaşlığı ölkələrini əhatə edən Avropa İttifaqı təşəbbüsü olan “Gənc Avropa səfirləri” şəbəkəsi çərçivəsində dəstəklənir. 06В