Avropa İttifaqı səfiri Peter Mikalko “Avropa gənclər ili” barədə

Bakı/05.10.22/Turan: Avropa İttifaqının Azərbaycandakı nümayəndəliyi “Avropa gənclər ili” ilə bağlı kampaniyaya başlayır. Bunu oktyabrın 5-də mətbuat konfransında Avropa İttifaqının Azərbaycandakı nümayəndəliyinin rəhbəri səfir Peter Mixalko deyib.

Koronavirus pandemiyası dövründə gənclərin üzləşdikləri  çətinliklərlə əlaqədar Avropa İttifaqı bu ili “Gənclər ili” elan edib. “Məqsədimiz hökumət, təhsil müəssisələri və vətəndaş cəmiyyətilə əməkdaşlığı inkişaf etdirməkdir. Biz fəxr edirik ki, “Erasmus+” layihələrində getdikcə daha çox müəllim və tələbə iştirak edir”, - o deyib.

“Biz bu kampaniya çərçivəsində gənclərin təhsili və məşğulluğu üçün bərabər imkanlar yaratmağı planlaşdırırıq. Pandemiyaya qədər 3500 azərbaycanlı tələbə “Erasmus+” mübadilə proqramı çərçivəsində təqaüd alırdı. Bu il biz bu rəqəmi artırmışıq. Ötən il kredit proqramımız çərçivəsində 500 təhsil müəssisəsi kreditlərdən yararlanıb”, - səfir bildirib.

Mixalko əlavə edib ki, bu proqram təkcə Bakıda yox, Azərbaycanın regionlarında da həyata keçiriləcək. “Regionlarda 10 mindən çox uşaq və valideyn uşaqların erkən inkişafı üzrə təhsil proqramına cəlb edilib. Həmçinin regionlardan 885 nəfər peşə təhsili keçib”, - səfir deyib.

Onun sözlərinə görə, “Avropa gənclər ili” çərçivəsində yaxın həftələrdə Bakıda bir sıra tədbirlərin keçirilməsi planlaşdırılır və bu aksiya oktyabrın 28-də başa çatacaq.

Səfir Avropa İttifaqının ərazilərin minalardan təmizlənməsi prosesinə dəstəyinə də diqqət çəkib.

Qeyd edək ki, “Avropa gənclər ili” kampaniyası çərçivəsində Azərbaycanda 13 layihənin həyata keçirilməsi nəzərdə tutulub. 16D