Avropa İttifaqının “Özün yarat!” ekoloji müsabiqəsinin qalibləri

Bakı/24.08.20/Turan: Azərbaycan Ekologiya və Təbii Sərvətlər Nazirliyi, Avropa İttifaqı və BMT İnkişaf Proqramı tərəfindən  təşkil olunan “Özün yarat!” müsabiqəsinin qalibləri müəyyən edilib.

Müsabiqəyə 200-dən çox müraciət daxil olub. Müsabiqənin şərtlərinə görə, gündəlik həyatda tullantı hesab edilən  əşyalar yenidən düzəldilərək göndərilməli idi.

“Özün Yarat!” platforması zərərli tullantıları azaltmaq və ətraf mühiti qorumaq məqsədilə insanları təkrar istifadəyə dair yaradıcı fikirlərini bölüşməyə təşviq etmək üçün yaradılıb. Müraciətlərin sayı Azərbaycan xalqının incəsənət və əl işlərində olan istedadından və təbiəti qorumaq barədə qərarlılığından xəbər verir”, - Aİ-nin Azərbaycandakı səfiri Kəstutis Yankauskas  deyib.

Müsabiqənin qalibi (3000 manat) plastik çirklənmə probleminə dayanıqlı həll yolunu hədəfləyən “Plastik çantalar” layihəsi ilə Leyla Məmmədova olub.

İkinci yerin qalibi lazımsız metal hissələrdən daşına bilən manqal hazırlayan Səid Əliyevdir.

Üçüncü yeri Kamran Qasımzadə qazanıb. O, köhnə metal çəlləyi hər evdə istifadə edilə biləcək rəngarəng əlüzyuyana çevirib.–71D-