Avropa məhkəməsi Eldar Həsənovun müalicəsi barədə sorğu göndərib

Bakı/29.04.21/Turan: Avropa məhkəməsi keçmiş səfir, həbsdə olan Eldar Həsənovun vəkillərinin Avropa İnsan Hüquqları Məhkəməsi qaydalarının 39-cu maddəsilə müraciətini ötən həftə araşdırmağa başlayıb və Azərbaycan hökümətinə qısa müddətdə cavablandırılmasını tələb edən sorğular göndərib. Bu barədə vəkil Cavad Cavadov Facebook səhifəsində yazıb.

Onun sözlərinə görə, vəkillər Avropa İnsan Hüquqları Məhkəməsi qaydalarının 39-cu maddəsinə uyğun olaraq müraciət ediblər.

“Müraciətimizdə Eldar Həsənovun özəl tibbi klinikalarda müayinə edilməsi, müayinə üçün onun özünün seçdiyi həkimlərin dəvət edilməsini və planlaşdırılmış (hələ həbsindən əvvəl həkimlər tərəfindən planlaşdırılmış əməliyyatlardan söhbət gedir) əməliyyatların keçirilməsi üçün müvəqqəti qərar qəbul edillməsini xahiş etdik. Avropa məhkəməsi keçən həftə bu müraciəti araşdırmağa başlayıb və hökümətə müvafiq qısa müddətdə cavablandırılmasını tələb edən sorğular göndərib”, - vəkil qeyd edib.

Həbsdə olan sabiq səfir Eldar Həsənovun vəkilləri bir müddət öncə onun səhhətində olan ciddi problemlərlə bağlı Azərbaycan prezidentinə mətbuat vasitəslə müraciət ediblər.

“Çox təssüflər olsun ki, bu müraciətin əks- sədasını görə bilmədik. Müvəkkilimizin səhhəti isə getdikcə ağırlaşır, onun sağlıq durumunu sözlə izah etmək mümkün deyil. Vəkil olaraq utanıram ki, adekvat tibbi yardım göstərilməsinə Baş Prokurorluqun İstintaq İdarəsi belə biganə münasibət göstərir və ona görə də həmçinin utanıram ki, sadə humanitar məsələni ölkə daxili hüquqi müdafiə vasitələrlə həll etmək mümkün olmur. Eldar Həsənov həbsinin ilk günündən bunu bəyan edib”.

Vəkilin yazdığına görə, hazırda Həsənovun  həbsdə saxlanma müddətinin daha üç ay atrırılması planlaşdırılır.

Baş Prokurorluğun mətbuat xidmətindən Turan-ın sorğusuna cavab olaraq bildiriblər ki, müdafiə tərəfinin vəsatəti əsasında Eldar Həsənovun səhhəti barədə məhkəmə-tibb ekspertizası təyin edilib, verilən rəyə əsasən cinayət işi üzrə hal-hazırda istintaq hərəkətləri davam etdirilir.

Eldar Həsənov 2020-ci il avqustun 13-də Dövlət Təhlükəsizliyi Xidməti  tərəfindən saxlanılıb. Avqustun 14-də Bakının Səbayel Rayon Məhkəməsi Eldar Həsənovun barəsində həbs qətimkan tədbiri seçib.

Dövlət Təhlükəsizliyi Xidmətinin İstintaq İdarəsində Xarici İşlər Nazirliyinin əməkdaşlarının barəsində istintaq edilən cinayət işindən Eldar Həsənovun barəsində Cinayət Məcəlləsinin 308.2 (vəzifə səlahiyyətlərində sui-istifadə etmə) və 308-1.1-ci (büdcə vəsaitlərindən təyinatı üzrə istifadə etməmə) maddələri ilə cinayət işi ayrılaraq aidiyyəti üzrə Baş Prokurorluğa göndərilib və hazırda istintaq orada davam etdirilir.

Dövlət Təhlükəsizliyi Xidmətinin 2020-ci il iyulun 3-də Xarici İşlər Nazirliyində keçirdiyi xüsusi əməliyyatdan sonra bu nazirliyin 5 vəzifəli şəxsi saxlanılıb. Sonradan həmin şəxslərin hamısı ev dustaqlığına buraxılıb. Yalnız Eldar Həsənovun ev dustaqlığna buraxılması barədə vəsatəti təmin edilməyib.

Eldar Həsənov 2013-cü ildən 2020-ci ilədək Azərbaycanın Serbiya, Monteneqro, Bosniya və Hersoqovinada səfiri olub. Bundan öncə 2001-2013-cü illərdə Rumıniyada səfir olub. Eldar Həsənov həmçinin 1995-2000-ci illərdə Azərbaycanın baş prokuroru olub.-03-